不關我的事@維修

尋晚成十點幾先食完飯，今朝上磅又重左，前幾日都逐少逐少回落，尋晚一役真係慘，雖然，唔係重好多，但都係‧‧‧。

尋晚食飯老公問部相機點？我今朝打過去問，輸入單號碼後，電話錄音話未得。老公話要十點出門口，然後去食早餐，我就9點9叫佢，佢又唔起身，再隔多陣我問佢。

我：點丫？(少少躁)
老公：咩點丫？(發老脾)
我：你自己明明話15分鐘就可以出門口架嘛！
我：咁你做咩發我脾氣丫？(老公係床到典。)
老公：被人嘈醒係咁架喇！

我老公就係咁架喇！我地落去食早餐，老公食到一半話肚痛，唉~咁即係要回家喇！我怕趕唔切1點前去到拎電腦，講完不夠3分鐘，我個肚又痛，食完齊齊回家攪掂先，我係2個鍾內痾左3次。

今日搭巴士又經過果到喇！今次有好多白鴿係地下，突然間又飛返上去。

我上去拎電腦，職員話已換左〝SD底板〞，咁我問究竟咩事？個職員話師傅冇寫，想知佢就搵師傅問，咁唔駛喇！試左機冇問題，都係隨口問下啫！

上次決定拎機時做埋〝保養升級〞，而家部機upgrade到3年保養。走既時候老公幫我拎住個背囊等我執野。

老公：嘩~你個背囊咁重既，拎返部Notebook出來喇！
我：唔制，我專登孭背囊架！咁咪唔駛你拎住Notebook咁麻煩囉！

雜開〝Acer〞後，我地諗住請同屋吃飯，但佢今日唔係呢邊。老公講電話時行過左〝咀香園〞，行到〝叮叮〞站時，我話佢又話買比我食既，老公話行返過去，但我又懶得行，而且又有〝叮叮〞，所以都係冇買。

我地落銅鑼灣拎電話，〝叮叮〞停左好耐，我無聊四圍望，成日係電視聽到話〝去曲藝社操曲〞，而家真係被我睇到〝操曲局〞喇！聽就聽得多，見就係第一次。

〝叮叮〞經過〝Sogo〞對面，老公話有人拍戲，我回頭望〝係人地競選拉票啫！〞，其實，當時已距離半條街睇不清，老公話係〝林保怡〞啵！橫掂一陣都要去〝商務〞，拎完電話再回來睇。落車時老公又叫我拎部Notebook出來，我孭住就唔重喇！

今次拎電話又係唔駛等，一拎籌就即到，我又係問咩事？

服務員：電話裡面有條線斷左。
我：咁係咪我用既方法唔啱整斷左佢呢？
服務員：哦~唔關事。
我：嗱~唔關我事架！(立即望住老公)
老公：又唔見我部有事。
我：唔關我事架！唔係我整壞，係佢地壽命短咋！

再行回拍戲地方已人去，但道具剛執完。我手上有4張50蚊商務Coupon，coupon未到手時已有心水想買，但而家再睇又唔多想買。

我左睇右睇睇中左本〝靚湯王〞，睇左好耐都冇書合心水，但98蚊咁咪蝕2蚊，之前知道蘇民峰與女友出左本烹飪書已想買，我再細心翻閱一下先，就買埋佢，但係又差D，但其他真係唔想買。

我行過去問老公有冇書想買？佢好決絕話〝冇〞，然後老公一言驚醒，你用3張coupon再加少少錢咪得囉！係啵~點解我突然蠢左既呢？

我地起程去搭巴士回去，途中見到〝Diesel〞係街做左Display，但又唔見有〝Diesel〞舖頭。

離遠已見到有架巴士埋站，但有一架隨後，但佢飛站，我地就要跑去搭多人果部，差不多到總站老公話肚餓，食埋野先返去，因為我地仲要轉車先返到家。我地又係例牌食〝大家樂〞，食飽飽就再等巴士。

我等巴士既時候，整包個糰火突然燃燒，而且尋日老公應承幫我搓麵糰，咁我又可整其他野，但老公話幫酊就幫喇！腳痛要睡一睡，腳痛要瞓架咩？你想瞓就真喇！佢就係到傻笑。

終於老公係瞓左，我自己一手一腳整左〝菠蘿果醬包 (內附食譜)〞。老公唔想煮飯，我地出街食，食飯前老公話要行一陣，咁我就買左隻盒蛋米奇嘞！我地去食車仔麵，食完又行一陣消化下，行左幾間玩具店，呢盒米奇冇一間平過我頭先果間。頭先食左尋日買左個忘記吃的水晶梨，十蚊隻真係好食好多，又爽甜多汁。原本諗諗煮〝百爵香滑奶茶〞等老公明天加埋個〝菠蘿果醬包 (內附食譜)〞做早餐，但係太夜仲要睇〝文雀〞，所以都係唔煮喇！