茄汁豬扒 (內附食譜)

今日問老公想食乜？佢話要食〝茄汁豬扒〞，吓！咁要鮮茄定茄膏丫？要鮮茄，我立即上網搵食譜，老公與肥仔一樣都話要食〝茄汁豬扒〞，之前肥仔仲話我煮過好好味，我真係抓頭，我都未煮過〝茄汁豬扒〞，仲要話好味。

我將搵到既食譜加加減減，就煮左呢味〝茄汁豬扒〞，老公食左一啖就話『好味』，我話係汁、番茄定豬扒好味？佢話樣樣都好味。

我記憶中老公係第2次唔駛問自動話『好味』，我都覺得好~好~味丫！不過，老公唔識貨，居然唔撈汁，我就醒汁都一樣好味。下次回家煮一定受歡迎。

茄汁豬扒

材料：(2人份)

梅頭豬扒           2塊

番茄 (細)           1個

醃料：(順序加入)

生抽                   適量

老抽                   適量

糖                       適量

胡椒粉               適量

蛋白                   半隻

生粉                   適量

麻油                   適量

油                       適量

水                       適量

獻汁：

水                       4湯匙

茄汁                   2湯匙

鹽                       1/2茶匙

糖                       1/2湯匙

生粉                   1/3茶匙

做法：

1)      用刀背將豬扒拍鬆。

2)      順序以適量生抽、老抽、糖、胡椒粉、蛋白等和豬扒混和醃味。

3)      將豬扒放入雪櫃冷藏15分鐘。

4)      從雪櫃取出，再加入生粉、麻油、油、水。

5)      以中大火煎熟豬扒，然後切件。

6)      爆炒番茄，加入獻汁煮滾。

7)      將豬扒回鑊炒至杰，即成。