天公不做美@高達叔叔生日

5 October 2008

尋日天氣幾好，仲有陽光添！所以原定今日〝巴比橋〞如常進行。尋晚新聞話所有風球取消，加上我既肩頸痛嚴重左，未來幾日都應該會落雨。

今朝7點幾已見街外地下濕晒，再訓多幾個字先起身，感覺到肩頸好似有人大力捏住咁痛，頸又不能活動自如，若然要再擰過D，就要連身都郁埋，感覺十分難受。

我起身梳洗，我洗洗下頭電話響，心諗唔通係熊貓姐姐來電問要唔要取消〝巴比橋〞，洗緊頭又出唔到去，電話咁嘈衰佬仍然瞓到成隻豬咁(意料之內)，電話響到掛線，我拿拿淋洗埋個頭先，幾秒後又再響，立即包頭衝出去，原來係開心果姐姐。

我地傾左一陣，咁既天氣和雨勢〝巴比橋〞要取消，就改行〝Plan B〞去同屋住家〝打馬吊〞，都係照原定時間集合。開心果姐姐提意飲茶，所以到咁上下我就叫老公通知有關人士，CoolMan叔叔不懂打馬吊，所以不來，而高佬叔叔就晏D來，然後又通知同屋住去附近搵位飲茶。

我地出門口時係〝黃雨警告〞，係城隧上受著風雨侵蝕，有傘都冇無，我與老公毛管豎起晒，連我都覺得凍。今日等左好耐先有車，到落車時身都未乾，又要再迎風雨。

老公遲左起身，所以我地係最後一批到達，我去到已食緊野，所以只係一部份既相。這裡竟然有我小時候飲茶必吃的〝沙翁〞，我地吃唔晒打包左回去一陣吃，但食物並不好吃，這酒樓仲標榜〝低鹽、低糖、低脂〞，但都唔係一係淡一係鹹到死架！

上次向同屋住老婆借左隻用狗拍戲電影，今次我見阿B睇史迪仔既片頭，對米奇既卡通有興趣又借左4隻，希望阿B睇得問心喇！

晏晝5點幾老公唔知肚餓定口癢，佢又唔喜歡酒樓打包回來既野，所以就決定落街買茶餐，當然其他人都搭單買喇！開心果姐姐就陪老公一齊去買，嘩~呢到既雞脾茶餐都只不過係13蚊，再加一蚊外賣杯，即係14蚊，但凍飲要加一蚊，要可樂就唔駛加錢，雖然，雞脾並不大隻，但將價就貨，係咁上下喇！最後每人都要一份茶餐，之後老公話行過一間要25蚊，樣樣都一樣梗係揀間平架喇！

高佬叔叔係我地打完12圈就來到，時間剛好可以去吃飯。高佬叔叔來到就比左袋野我，佢話想比我好耐，成日都唔記得，我打開個袋睇係個米奇盒，唉~咩嚟架呢？一開原來係米奇錶，我又多一隻錶進帳喇！其實，我家中已有十幾二十隻錶，但我帶來帶去都係2隻，其中一隻係阿嫂送給我的，因為以前返工，錶要來襯衫的，所以就有咁多。

今日主角係高達叔叔，所以我地送左個雞頭比佢(玩下啫！)。今次影左一幅相咋！所以冇舖出來，我怕影相阻住人食飯，若然大家都有寫Blog就話一齊影啫！所以我好羨慕有意同道合的人一齊影相，每次得我一個影好似怪怪的，其實咁樣我都有D唔開心架！不過，影與唔影都唔係大件事，所以都係算吧喇！

食完再打多4圈先走人，今日我又著左〝Mickey戰衣〞，所以又係大贏家，咁係咪寓意我每次都要著呢件戰衣呢？咁又係咪唔好洗呢？熊貓姐姐話洗左怕冇左個功效(講笑啫)。

老公話高達叔叔想星期二〝巴比橋〞，但老公話太〝忟〞，而且天氣咁樣，改月尾先喇！我一回到家就立即開冷氣，因為好熱，由於我肥今日不停出汗，咁都好可以燃燒下脂。

我原本拎左〝林海峰~是但嗡求其大合唱〞去睇，但小朋友要睇電視，大人要睇馬，所以我與老公安頓好一切就睇，可能我訓係到睇，睇睇左1小時到就瞓左，老公2點幾叫醒我瞓好D，見老公都熄左機，然後佢都瞓。同屋住、高佬叔叔和他的女友都話唔好睇，我睇左D都覺得冇之前咁好。