運動競技場@科學館

〝科學館〞為迎合奧運，所以攪左個〝運動競技場〞，我想去好耐架喇！今日終於如願以償，仲影左好多相添，又有短片架，不過，upload左仲係〝處理中〞，都唔知點解成日都要處理咁耐。

我等阿B放學就帶回去，再等埋娣婦放工就一齊食埋lunch就出發，娣婦有個同事與我地一齊食，所以有4個餐，我與老公又叫多一份〝奶油多多奶〞share。

食食下野聽到老公話〝我幫你倒起佢〞，抓頭勒！講咩呢？望下原來佢同隔離檯阿伯講，但老公講野細聲佢聽唔到，咁我就大聲D覆述一次，然後老公起身幫佢將碟野倒落外賣盒內。

我隔一陣望見佢好似閂個盒閂得蠻辛苦，我就叫老公幫佢，原來個盒扣爛，我就叫個仕應比一條橡皮筋或新的外賣盒個阿伯，仕應回來話全部外賣盒都係咁，所以就拎左條橡皮筋幫阿伯箍緊。

阿伯外表都有七十餘歲，隻眼看落唔係咁好，而且比我地還要早到睇餐牌。老公話碟野來時‧‧‧

阿伯：呢碟咩嚟？
仕應：啱架喇！

咁就放低左碟〝火腿茄汁意粉〞，阿伯望左碟野好耐，應該冇食過就打包，老人家點會叫碟咁既野丫！若然頭先我聽到就會問個阿伯叫左乜？就算佢真係叫錯，我都會話落單人寫錯。

今日肥仔要返工，所以得我、老公、娣婦帶阿B去〝科學館〞。我咁大個人第一次去〝科學館〞咋！老公與娣婦之前都去過，你話我幾out呢！

〝科學館〞有2種票價：$25、$35，〝運動競技場〞票價係$35，包括埋〝常設展覽〞，而$25係〝只參觀常設展覽〞，所以唔好買錯丫！

我問左果到收夜晚9點架！可以慢慢行勒！

首先去到最底層先，呢到就係〝運動競技場〞，入到去有好多人，樣樣都排長龍。我地仲見到肥阿哥個朋友添！大家傾左一陣，佢又係一家三口來玩，佢地已來左一個鐘有多。肥阿哥個朋友知道阿B唔玩，佢話鏡果邊阿B應該會鍾意。

呢到係模擬supermark，有小朋友買野、做收銀喇！食物係假架！但又做得好真。

我見有跳舞機，又唔係多人玩就去排下，諗住同阿B一齊玩，最後都係得我與娣婦一齊玩咋！早知唔排喇！

之後就去左鏡區域，唔止阿B玩得開心，我地大人都玩得好開心。

呢到係〝隱身鏡〞，我與娣婦都抱阿B影相，每人都影左2張，老公就梗係負責揸機喇！

由鏡區域行落去，又有遊戲玩，而且冇咁多人添！我玩左〝肥皂泡〞，我中和大都可以拉出肥皂膜，但係〝泡泡幕〞拉極都拉唔到。

之後又去左〝深海奇珍〞睇一D深海生物，我冒險影得2張相，因為被人發現。

底層行晒就由最高行番落去先，上到最高有2部分，左邊係動腦筋遊戲區，右邊節約能源區域。

我地有幸睇到〝能量穿梭機〞，因為佢晚上7點啟動，我唔知仲有冇其他時段會啟動。老公話好似冇左咁~咁~咁~既，個護衛聽到話而家冇左，cut左好耐喇！

我地再落一層睇！嘩~天花板有好大隻飛機，而且有老公喜歡的帆船。

有好多食物，教你點樣保存和幾多卡路里，呢到都有遊戲玩架！不過，要輸入年齡我冇玩到，嘻~嘻~

再落多層就係關於〝職業安全〞，行左一陣就走，因為都成7點幾阿B要食飯喇。

我地揀左就近的〝大家樂〞吃，娣婦吃〝焗豬扒飯〞，而老公就要〝冬瓜盅拼楊州炒飯〞。

我叫左個〝爵士西冷牛扒〞再加多6蚊，就有齊我想飲酥皮湯和食個鮮果雪糕泡芙，但個泡芙食完先拎張〝換領咭〞取，我與老公一齊share。個焗薯好好食，上面舖左蛋沙律架！老公都話好味。

我地送娣婦與阿B回家，之後回到已經好攰喇！成個人散晒咁滯，但今日多數都係老公抱阿B，都唔知點解會咁？

老公12點幾又話想食麵，我就煮上次果D麵，呢款係轁轁做監製架！個packing仲有佢個樣添！今次我加左少少雞粉，因為實在係唔夠味。食完野又睇左〝森美做大 show 金牌司儀〞，睇到差唔多3點都未做完，都走左去訓，因為明天1點要入到粉嶺。