有錢未必能買@尋找

從小到大都聽過句俗語說：『錢唔係萬能，但冇錢就萬萬不能。』，但今日用於我身上不是太貼切。我想買既野一係就冇，一係就要週圍去先買到，買得真係辛苦。

星期日，我約左熊貓姐姐食lunch，因為上星期換唔到條褲今日再去換，而另一目的係去買衫來彌補星期日果件衫。

今日我唔回去湊阿B返學，因為阿B放12點15分，湊埋佢放學又趕唔切，帶埋佢去又唔肯行而家咁熱我好辛苦。今朝7點半叫老公起身又係唔願起，我訓下醒下咁叫佢起身。

我：喂~7點9喇！快D起身喇！
老公：我個頭好痛丫！
我：咁不如你今日請假喇！

老公聽到立即起身返工，尋晚問左老公今晚想食乜？佢只係講話唔想食烏冬，食到好腌悶，今朝我諗諗下不如整〝沙嗲牛肉湯意〞，記得〝美味醬汁Cook得起〞有教整沙嗲汁，睇下本書係教人整〝沙嗲雞串〞，雞都OK喇！沙嗲汁要用香料，一陣去〝二德惠〞和〝橘子〞睇下D香料先。

我去搵位等熊貓姐姐來，我入到去差不多坐無虛席，坐低後餐牌未睇完熊貓姐姐就到，佢提意叫客飯，我地order左〝通菜炒牛肉〞和〝咖哩薯仔雞翼〞。落單後冇耐就話冇〝咖哩薯仔雞翼〞，咁樣就改〝麻婆豆腐〞。

我地等左好耐乜都冇，熊貓姐姐話今日比平時多人，〝麻婆豆腐〞味道幾好，而〝通菜炒牛肉〞D牛肉都唔錯，好似冇乜〝拿〞過。呢到有湯有飯又有餸，野飲加幾蚊就有都OK喇！

食完我地一齊行左一段路就分手，分手前熊貓姐姐話：「好喇！你去行街啦！我去返工喇！」，我聽到佢好悽慘咁。

我行去搭電梯上〝二德惠〞和〝橘子〞，嘩！等電梯既人多到打晒蛇餅，好在好快就上到去，首先緊係去〝二德惠〞先喇！我搵左好耐都搵唔到想要既香料，就買左其他野！之後行樓梯落一層去〝橘子〞，我又係搵左好耐都搵唔到，咁就問果到職員，佢地話係冇，我見6吋蛋糕模紙〝二德惠〞未仲返貨，而〝橘子〞有用開果隻見十蚊就買左一包。

我覺得〝橘子〞既職員好過〝二德惠〞，佢地nice、helpful過〝二德惠〞，〝二德惠〞果D好Cool既！

跟住我就搭地鐵去家附近商場行街買衫和去Taste睇下應該有我要既香料，我過馬路突然有人拍我隻手察身而過，擰轉頭一望原來係肥阿哥，佢講緊電話，我掛住過馬路都睇唔到佢添！

今日唔知點解冇心情買衫，只係去左平時去開果間睇完就走。突然記起買個水杯比阿B返學用，於是就去左Trendyland，我想要既米奇全線都買晒，咁我就只係買左個散子包，臨走前拎多本季刊係比阿B睇既！我本mark晒野怕阿B整爛。

之後去左Taste，我搵到想買既香料，只係得有機先有，而且份量都唔係好多，所以都覺得貴，2盒野加埋要成四十幾蚊，但我想買既蔗糖，只有冰糖款，唯有回家自行整碎喇！

之後去左凍肉舖買雞扒，我怕唔夠吃又買多4隻醃好既雞翼。回到家慢慢睇下個〝沙嗲雞串〞點整，睇到個〝沙嗲醬〞要將材料攪碎，咁先記起尋日係報紙剪左coupon要去7-11換個〝迥轉式搗碎器〞，諗住一個我一個阿婆，但冇左件事。

我立即再換衫落街急步行3-5分鐘到7-11，因為我怕換晒！店員話呢到冇得換要去指定150間先有，但佢又唔知邊間有，我就再過對面馬路，又急行3-5分鐘到另一間，呢間有不過換晒！

店員：換晒喇！明天已經係最後一日。
我：吓！唔係換到21號咩？coupon寫換到21號。(我望下隻錶，今日先19日)
店員：D貨明天就收返倉。

我都費事再追問怕阻礙佢做野！又急急腳回家預備晚餐，又白行一趟。

自從老公睇完〝森美做大Show〞後，而家每次我影親相佢都話〝Milk豬〞，頭先佢仲黏個頭係碗湯意旁邊，然後〝V〞字手勢添啵！真係比佢激死。

今餐〝沙嗲雞串湯意〞老公都好滿意，唯一要改善既地方就係要我煮快D，另外佢話個〝沙嗲醬〞好似有D阿差味，連胃氣都有喎！我又係一D都唔覺，佢D口味就真係怪怪地既！