娘家靚湯

星期六，日間冇厠所水，去完街回來就有，夜晚厠所水箱已有點怪，前晚回來時見到大口仔不斷有水流並有泡，但流量不多，然後又見大口仔地下附近又有好多水，就叫老公入去睇下，老公話厠所水多得滯，停完水個水量set大左，但之後又厠所水唔識停，所以老公關左個厠所水制。

尋日老公11點幾開始整個厠所水箱，有D發老脾，其實，佢冇諗過咁早起身既，都係佢去殊殊先起身啫！到今日為止一切正常。

今朝突然想食滷味雞腳，所以拍拍睡夢中的老公見佢郁就同佢講，佢應左我〝嗯〞，跟住12點十叫佢起身，就棟起5隻手指，即係要瞓多5分鐘，叫幾次都唔起，足知一瞓就瞓多一個鐘。

老公起身後，大家冇地方去，又唔知食乜，頭先都你問去唔去荃灣，我想去試〝Grace~老闆娘〞，但你又擰頭。我掛住阿B就去肥阿哥到，因為肥仔一早已過左去。

老公諗住上到去樓下先買茶餐，肥仔又話可以食得落。決定左就立即動身，去買滷味經過〝大家樂〞，老公就去睇下，最後都係係〝大家樂〞買，我例牌食〝公司三文治〞加碗粉，老公又係加碗粉，不過，食蜜汁雞脾，而肥阿哥和肥仔都係食油雞脾，阿嫂和娣婦就食滷味。

〝皇帝〞放左出來喇！但我見到棟仙啄佢隻尾啵！

今晚大家齊齊回娘家吃飯，我打開個煲蓋已聞到係〝土伏零〞既味，坐回餐檯就問阿媽〝係咪土伏零湯？〞，阿媽都話我醒一睇就知，我話我唔係睇架！我一聞就知，阿媽話係用左土伏零、牛大力和鑽地老鼠煲，老公與肥仔聽到〝鑽地老鼠〞就好驚，我話係冇睇〝阿蘇〞咩？鑽地老鼠，唔係老鼠來的，同埋佢地聽到〝戰地老鼠〞。

我叫老公飲多碗，呢款湯去濕，加上我唔會煲，土伏零好硬架！而且我樓下冇得買，而家好少地方有得賣。我知菜檔可以幫你削皮，不過，硬到死自己返去點斬開一舊舊煲湯丫！

前日老公叫我尋日打去〝Acer〞問部Notebook拎得未，因為佢想趁佢放假陪我去拎，打後既星期六可能要返工。我尋日9點幾打過去，成日都繁忙要留口信，我打到有人聽為止，約十點有人聽，講左資料hold左條線好耐，跟住話晏D覆。

我見11點幾都未有消息就再打多次，今次都話要問左師傅晏D覆，因為近lunch時間，跟住就掛線，我心諗頭先打來早喇呱，問到而家都未得。跟住出街記起又咁耐都未覆，老公話唔好打你又唔係今日拎，但我都要有個知字架！

我再打去問，佢話晏D師傅直接覆我，等左1個小時有多師傅來電，佢話部機慢可能係我裝左個Office 2002與Vista唔夾有關，問介唔介意將部機系統還原去出廠當日，我未抄起Data喎！佢就叫我抄起Data後自行還原。我最重要係個card reader問題，佢話要幫我換過塊SD底板試下，之後會盡快覆我。