扮靚‧飲食‧購物

尋晚我失眠，由11點幾上床碌到成2點幾先瞓得著，老公習慣聽住電台節目瞓，正因這樣我就聽到李力持介紹北海道，肥阿哥和阿嫂下個月會去，咁啱肥阿哥搵我，所以我同佢講過下買咩，因為佢叫我搵阿嫂買喎！

今日有個朋友比左3張facial coupon我，所以我就約埋熊貓姐姐和至Fit姐姐一齊去做嘞！我與老公坐巴士出去時，老公話我成日去游水，又話我成日帶住個水泡出街，仲話我好似阿B咁，帶住一對手袖和坐住個水泡，你話佢係咪〝五恆欠丙〞。

真心泰國菜
我地做facial前去醫下肚先，熊貓姐姐同事介紹我地去附近一間泰國菜館吃。起初比綠色menu我地睇，後來比多一個用木做封面既menu我地，但2個係有分別，綠色for lunch，而木面for dinner。

我地叫左4樣野share，佢話有3杯飲品送，老公order杯望落去好似甘筍汁既〝泰式奶茶〞；熊貓姐姐order杯好水既〝海底椰〞；我order杯淡茂茂既〝菠蘿紅毛丹〞；至Fit姐姐唔飲。

冬陰公湯河~個湯幾好味，不過，唔夠辣。老公與熊貓姐姐覺得呢個最好味。

香葉肉碎飯~又係唔夠辣，唔係好油，我覺得最好味。

乾炒鮮蝦河~一般，菜炒得好爽。

小吃併盤(大)~我落order時要求每件野都一開二，真的一開二後先拎去炸。蝦餅夠彈牙好吃。深啡色係魚餅，店員話好吃，佢唔講我都會試一試，吃時唔腥，但好鹹，個感覺好似〝梅香鹹魚〞咁，而且帶少少骨，但不用吐骨。

我食食下發現有條骨拮左係牙肉與牙之間，條骨好幼架咋！埋單後仲有甜品送。

Facial
跟住我地去做facial，而老公就週圍逛等我地。約左3點，要我地早15分鐘到填表，我地2點半就到，但到走都冇填過野。我地係休息地方睇電視等，果到坐坐下都滿晒人，人陸陸續續被傳召，約3點熊貓姐姐入，3點過D到至Fit姐姐，由全場full house變得番我一個冷冷清清，後來有個職員問我號碼，再不停問邊個負責，終於到我喇！

我入到間好大既房，熊貓姐姐和至Fit姐姐都係入面，做facial之餘，仲有按少少肩頸。美容師叫我應該要保養，因為我只係用清水洗面、冇搽cream，佢話以前好似我咁，而家皮膚已冇彈性，好在佢話我皮膚仲好彈，但膚色暗啞。

我：按肩頸不到位，facial一般，但我落床開始就好似皇太后咁~有人攙扶，佢一直護送我離開間房，去到安全位置。
熊貓姐姐：按肩頸位到位，令佢鬆左好多，因為佢個美容師之前係按摩師的。
至Fit姐姐：真係成日人都好relax。

之後例行公事有個顧問收集意見和sale下野咁，佢話公司唔準做facial時sale客，怪唔之得頭先3個美容師冇sale我地product喇！

老公話攰咁又係既等左咁耐，我地去左〝仙蹤林〞坐低，我與至Fit姐姐食〝凍燒仙草〞，好耐冇食令我諗起以前返工既日子，熊貓姐姐叫左杯野飲，老公齋坐，因為佢剛飲左包檸檬茶。

彩豐行
熊貓姐姐要去〝彩豐行〞買野，聽就聽得多，去都係第一次~真係鄉理，上到去D野真係咁平。以前返工時代我都有幫自己對腳磨砂，既然頭先美容師話我要保養，咁我就買盎足部磨砂(400ml)和腳Mask(400ml)先，咁大盎每盎都係45蚊咋；潤唇膏(8ml)就貴D要14蚊；沐浴露(1000ml)咁大支都係25蚊，仲有smaple送，樣樣都咁大有排用。

頭先熊貓姐姐睇左飲食男女介紹〝九龍城~清真牛肉館〞唔錯，至Fit姐姐要回家去，我地就坐小巴去九龍城食飯，去到有好多人，我地要等埋高達叔叔，就攞定位先，然後行去九龍城廣場行下，發現果到有〝吉之島~十蚊店〞，緊係入去行下，咁當然有收穫喇！行出廣場見對面馬路有零食買，又係十蚊幾件，入去睇下有冇老公喜歡的甘大滋，結果就買左咁多野嘞！

高達叔叔已在〝清真牛肉館〞等我地，齊人咁我地就入去，果到D野真係唔錯！詳情請去：清真牛肉館。

食完飯又去食糖水，呢間熊貓姐姐試過唔錯。

老公例牌食〝海底椰涼粉〞；高達叔叔唔舒服order〝川貝雪耳燉鹹柑桔〞潤一潤；熊貓姐姐都order〝滋潤五寶露〞，我唔記得問佢地好唔好食，但我既〝粉紅佳人〞就唔錯，但細碗要26蚊就貴D。