美味晚餐@金船長餐廳

今日老公請假，係預留比老爺睇下新屋有咩要幫手，但新屋要做既野都整晒！所以老公今日可以陪我，而明天假期都可以，之前聽錯左老公話都要返工，原來佢係話星期六返左明天就唔返。

我見平時老公冇機會湊阿B返、放學，所以我叫老公一齊湊放學，然後帶佢去街。我就通知娣婦，順便問下佢去唔去嘞！娣婦話肥仔今日都放假，我就問肥仔去唔去，佢話一陣先算。

老公又約埋今日放假既高達叔叔去睇模型，不過，佢要約6點回家收舖，只可以行1、2個鐘就要走，所以不來，既然係咁就帶阿B去〝奧海城〞行下，地方又大人又唔多。我與老公食完早餐+晏就回去湊阿B放學，然後回家與肥仔一齊出去。

搭車時我與肥仔講〝都想叫埋阿嫂來，但佢實要陪肥阿哥〞，之後我都叫肥仔打左比阿嫂，不過，阿嫂要返學，肥阿哥又有舊同事去佢家玩。我地去到大家都口渴就去〝Taste〞買野飲，肥仔買既〝比菲多〞都唔錯，係益力多味加蘋果味。

之後我帶阿B去〝冒險樂園〞行，佢地就去食煙，我問佢玩唔玩又擰頭，但又不停要去呢邊、果邊掂下又禁下D制，肥仔見到咁就換錢買，老公與肥仔每人換左一百蚊，佢地一齊玩推錢，我拎左D弊就帶阿B四圍行和玩，差不多玩完娣婦就到喇！

原本係〝奧海城〞入面間日本野到食，但我去完殊殊出來，就話要行出去〝大角咀〞吃。之前CoolMan叔叔係大角咀住，都帶過我地去一間野都吃日本野，但我又記得〝林師奶~金船長〞介紹過話好好味，但當時我睇完只有印象〝金船長餐廳〞係大角咀，但我都不想太冒險怕要搵好耐，但肥仔話時間尚早堅持去搵下，好在肥仔堅持我地先食到好野。CoolMan叔叔介紹的與〝金船長餐廳〞只不過係背對背既舖。

我地去到就問有冇訂位，唉~係喎！好似講過呢間野要訂位，弊嘞！好在都有位，不過，要9點前埋單。入到去燈光昏暗，舖位亦不大，但位都幾full下，我地安排坐係收銀旁自成一角幾好。

這裡除左野食好味，服務態度又好，又細心，我地飲完湯先來小吃，到小吃差不多吃晒就來焗飯，一致受到我地高度評價，所以我就逐款介紹，這餐埋單$465，不算貴。

這裡你散叫，加錢就有餐湯、飲品、甜品，不過，有D笨品要早點Order，因為要焗半個鐘，有3款配搭任君選擇：

加20蚊~餐湯、熱飲一杯、凍飲加2蚊
加28蚊~餐湯、熱飲一杯、凍飲加2蚊、甜品一款 (餐牌上的甜品要30蚊以上一款)
加30蚊~餐湯、特飲一杯

我地問要咩要點先可以有以上既優惠呢？佢話我地叫既野食，足夠我地每人加20蚊有一個餐湯和飲品，咁就加20蚊先喇！

今日餐湯有2款，但我地全部都飲〝牛尾湯〞，湯味唔太濃，阿B追住飲添啵！阿B見到個蒜蓉包，立即拎來吃。

原來餐湯有蒜蓉包，早知唔叫多碟喇！蒜蓉包沒什特別，一碟要20蚊，即係5蚊件，不過，阿B見到食完要再食。這碟〝肉醬薯角〞味道唔錯，但冇其他咁突出。

〝蜜糖雞翼〞~雞翼入面都有蜜糖甜味，個皮又好味，我諗佢係用蜜糖來醃雞翼。

〝炸魷魚鬚〞~吃過後讚嘆不矣！真係一分錢一分貨，個炸漿薄薄包住魷魚鬚，炸得好鬆脆，魷魚鬚硬度適中~Yummy。

〝金船長漢堡〞~這個40蚊，我覺得抵過〝Mos Burger〞，不過，牛肉味不夠〝Mos Burger〞濃，老公話淋左D，但我覺得好似小時候茶餐廳既漢堡味。雖然如此，但大家都豎起手指公。

這個包分左4氛，老公係第一個吃，佢要分拆來吃，佢話可以一啖吃就好，嘻~嘻~我剛好可以一啖咬個包，肥仔仲勁係一啖就吃左1/4喇！

老公聽到來這裡吃的人，都一定會叫這個吃。老公話好在冇叫碟炸薯條咋！因為又有薯條伴碟。

〝焗白汁雞飯〞~係一塊雞扒，雖然，味道淡淡，不用加調味料都好味，size與pizza hut差不多，pizza hut飯太淋，品質就差好遠。肥仔話個汁好香奶味。

〝焗茄汁豬扒飯〞~肥仔喜歡吃這個，因為味濃些，但我兩款都喜歡，豬扒好淋，不似街外的乾乾的，個汁好香。

最後我地3個都加左28蚊叫左甜品，娣婦加30蚊叫左杯特飲~Moach，加埋朱古力漿夠甜，娣婦話好好飲。

〝巴菲〞~老公order的，第一個到，老公不愛吃甜品都話好味。內裡的cream係凍的，連朱古力漿一同吃下好滿足丫！阿B都吃左半粒。

〝焗梳乎厘〞~有好多種味，我本想order橙味，但落單時問邊種好，佢話自己喜歡〝原味〞和〝薑味〞，所以我order左原味。這既係廚師推介和要焗半個鐘，所以要早D叫。阿B用手想拎來吃，佢都食左幾啖架！其實，我不喜歡吃這個，因為我不喜歡吃炖蛋，但這個又唔錯啵！得閒我又試下整先。

〝朱古力心太軟〞~肥仔order的，又係廚師推介和要焗半個鐘，所以要早D叫。介開就有好多朱古力流出，有濃濃朱古力味，啖啖都有朱古力漿，而白雪就係雪糕，我估係自家製，奶味好重又不太甜~正。

娣婦走的時候拎左張咭片，大家都好滿意咁離開。

金船長餐廳~Golden Captain Restaurant

地址：九龍大角咀道大全街55號3A
電話：2381 7369
營業時間：每日早上11時至晚上11時
E-mail：golden1688@biznetvigator.com
Fax：3548 6886