14 October 2008
今日我等熊貓姐姐放工，然後去佢家幫手執野，因為佢家中明天要換食水喉。
今朝十點幾就食晏，因為細舅父12點幾要去醫院覆診，細舅父和舅母十點幾到來，跟住大家就一齊食飯。
飯後1小時，我見阿B又返左學，肩頸、頭和耳骨後都痛，所以就去左眠，一眠就眠到約3點接阿B放學，個人鬆左少少。我湊阿B放學，再等到5點就出門口。
巴士上有位太太帶住2個小朋友，佢前面孭住一個小朋友，又帶住一個。突然，佢問坐我旁的小姐路，但小姐答佢巴士個牌會有顯示，佢咁答我估佢都可能不太懂，過左幾個站太太話要落車，我忍不住拍拍佢，你的目的地距離呢到好遠，到站時我叫你喇！佢講〝唔該〞就坐下。
我幫她禁鐘，到落車時手拖的小孩原來瞓左，佢就踎下將睡著的小孩孭上背，但當時情況好狼狽，我與坐我旁的小姐都一齊幫佢手，我見要落車都落完，我就大叫〝司機未得丫！〞，但情況太混亂忘記講〝唔該〞，真有點失禮添！
我坐車時諗起奶粉要買，所以就去左〝二德惠〞走一轉，雖然，講過今個月唔買野，但都忍唔住買左少少，到付款時老公來電問我係邊？佢知道後就話你又Shopping丫？
我與熊貓姐姐會合後，就坐小巴轉小巴回到佢家，但我太早食晏覺肚餓，我地就去買野食，買左以前常吃的〝燒爉雞翼〞，再加多件格仔餅，當然係share喇！
我地經過商場又見到〝三潤〞擺Booth，上次阿婆話雲吞麵好食，所以我又走去八下嘞！今次雲吞麵仲平1蚊個麵，所以我就買左20包，加買多十蚊3個手打麵，以備平時當早餐吃。熊貓姐姐起初都係諗住買十包雲吞麵，後來受我影響又買20包，攪到大家都好似師奶咁！
我地好快就執好野，2隻貓就走左入書房，細B仲好嘆坐係佢老豆張大班椅到添啵！
我與熊貓姐姐去拎位先，高達叔叔和開心果姐姐隨後就到，開心果姐姐仲話高達叔叔公司就摺埋。我地坐定後老公就到，當然要關心一下高達叔叔喇！原來佢老闆要移民，所以佢做到今年12月。大家見面緊係傾下計和講下笑喇！我又約左開心果姐姐星期五去睇〝保持通話〞。
開心果姐姐話好耐冇book場打波，熊貓姐姐話我有book，不過，book唔到好難book。開心果姐姐話若然book佢家附近我打唔打，緊係打喇！我要減肥嘛！今個星期我誓要book到場。
我見高達叔叔12月會得閒，所以就相約佢去影相，到時我諗住借老豆部菲林manual機去影相，佢就緊係用DC manual機喇！開心果姐姐有2個朋友都係玩影相，其中一個技術upgrade左換左部新相機，開心果姐姐又對影相有興趣，所以以88拆買部舊既比佢，但佢心大心細，佢遲D佢會print個list出來，等我交比肥阿哥睇下。
我：你唔比高達叔叔睇？
開心果姐姐：都唔知佢幾時開電腦。
高達叔叔：我星期六會開。
我：你燒比佢咪得囉！
開心果姐姐：咁我唔會寫回郵地址，你知喇‧‧‧
高達叔叔：到時我會上來敲你門架喇！
我叫左開心果姐姐等我做野時，與她一齊玩影相，因為我都好鍾意影相，而家Pro既杷機對我來講係奢侈品。我最喜歡既係〝海鷗〞相機，〝海鷗〞係牌子，係古懂款既相機。
開心果姐姐星期六會與同事去BBQ，佢問我與熊貓姐姐去唔去？熊貓姐姐有事做，而我可能要陪阿B去〝協康會〞，所以推左，但開心果姐姐問既時候我聽左另一樣野。
開心果姐姐：果到有好多〝山根〞。
我：吓~咩〝山根〞？(我諗一諗就知)
開心果姐姐：咩〝山根〞？單身。
老公：我都聽到你造〝山根〞，所以我都諤一諤。
今晚大家都笑不停，咁樣真係會肥死，食餐飽又笑餐飽。
我地中途見到有人推銷〝高力豆沙〞，所以我地叫左一碟吃。差不多吃完就每人叫左一樣甜品，我、熊貓姐姐和高達叔叔要〝楊支金露〞，但我覺得麻麻，因為有芒果爛味；老公和開心果姐姐要〝芒果布甸〞，我試食左，佢地見到我既表情就問〝係咪好難食？〞，一般喇！但你個樣好難食咁啵！佢地食左都話No good，但個〝蘆薈糕〞反而唔錯。
F
回覆刪除