剧扒@自煮

今朝我十點幾煮左個〝福宇米粉〞吃，老公11點幾起過身一陣，睇電視和上網。

我：今日會唔會出街？
老公：話唔知架！
我：咁你打比熊貓姐姐，去佢家坐下。
老公：佢未起身。
我：咁你打比開心果姐姐先。
老公：你打喇！
我：我唔得閒丫！寫緊Blog。

死佬嚟架！講完又走左去瞓，我話〝今日我唔會出街，你自己去食野喇！〞，我仲有2篇野未打架嘛！緊係要爭取時間架喇！佢一瞓就瞓到3點。一起身就話買野比我食，我緊係唔食喇！都費事理佢睇電視，佢問下又睇下電視，我都係一個答案〝唔食〞。

最後問到4點，我就比左個難題佢，我一定要食〝大家樂〞公司三文治，嬲得滯好肚餓，再加多隻雞腳，點解係難題？因為咁晏〝大家樂〞公司三文治通常都會買晒！

大家可能覺得我唔應該嬲，但係老公唔止一次架喇！佢成日都係咁，遇到唔想做既野就去瞓。衰佬真係好彩又被佢買到，邊食邊睇埋尋晚未睇完既〝文雀〞，跟住又睇埋〝火影忍者疾風傳〞。

頭先食野時，老公話今晚剧扒，食完就去〝Taste〞買扒和其他野，好耐都冇煎牛扒。買左盒白磨菇，而家D白磨菇平左咁多既，以前要成四十幾蚊盒。老公好鍾意飲〝金寶〞既白湯，下次我又搵下白湯點煮先。

頭先係〝Taste〞既家品部(租counter)睇到，D膠既4、5格抽屜都要幾舊水一個，有D仲成千幾蚊，膠來的駛唔駛咁貴丫！我以為面板係〝蔗渣板〞，老公話果塊係〝吸塑〞比〝蔗渣板〞實和耐用好多，但又唔係成個都係〝吸塑〞，所以唔值呢個價。
咩係〝吸塑〞？都係膠，但係係硬膠，表面花紋係用高溫壓成的。

食完飯，我洗碗，然後老公洗廚房、洗白白，再洗浴簾，洗廚房和厠所一向都係老公負責的。我洗定頭先買既〝無核青提〞來獎勵老公。