提不起勁@包餅

尋日老公吩咐我，打去〝Acer〞問下部Notebook幾時有得拎，因為打後既星期六老公都要返工。

今日扭扭下呼拉圈記起，嗱嗱淋打去問下先。唉~好快有人聽，不過，又係搵唔到師傅，所以要轉頭覆。我11點幾打去問，成4點幾先覆，耐到我自己都忘記左，到時我要帶備白單，就可以取回Notebook。咁明天又要早起，因為辦公時間得半日。

尋日想整包、餅，但毫無頭緒，今日我就想整包，拎晒用具出來，又磅左牛油等室溫，但等等下又唔想整嘞！好在其他材料未磅啫！雖然，決定唔整，但個心一直爭札〝整、唔整、整、唔整‧‧‧〞，後來又想整，奈何時間唔夠，整左就趕唔切湊阿B放學，D野冇放回櫃，留返明天有時間先整。

頭先發現〝Facebook~義氣仔女 Online〞，我無喇喇得返5點血，仲要重傷，我又冇打交點解會咁？立即問開心果姐姐咩事，原來我真係被人打，與我之前玩既on-line game好唔同，我都係喜歡以前既多D。

今晚滾左個〝紫菜馬蹄湯〞，蒸多個〝豉椒蒸排骨〞和炒多個〝蒜椒通菜〞咁就一餐喇！不過，老公6點幾來電，佢要等大陸車到，所以又要夜食飯。

〝豉椒蒸排骨〞水份我減左少少，所以今次既味道濃些，我比較喜歡，不過，老公話味道差唔多。老公又話個〝蒜椒通菜〞味淡，我立即再去加味炒過，佢成日都話我煮D味淡，但無理由架，佢係淡味人，而我係濃味人，又係我煮試左味，佢都話淡，真係要研究下老公咩事先。