口腫面腫

尋晚老公叫我瞓床尾，我緊係唔去喇！今朝叫老公起身時，感覺到喉嚨有D痛，而且個頭又痛痛地，所以叫老公幫我話比娣婦知，我今日唔湊阿B。

今朝9點鬆D娣婦來電，問有關阿B接送咭事宜，之後我上床典左半個鐘都瞓唔返。我喉嚨就冇痛，但鼻涕有少少血絲，可能我太大力，之後細力就冇喇！有幾聲咳，但咳和乞嚏就要就住，因為用力個頭就痛，而肩頸位就好似比人打左一身咁痛，又唔可以活動自如，仲腫左添！

今晚都要早D瞓，要多D休息和明早要帶阿B去〝協康會〞。娣婦話明早帶阿B去我家，但我怕阻住佢返工，所以拒絕左。

晏晝我炒左〝餐肉蛋炒飯〞，下次我要試整〝蛋包飯〞，然後去〝百佳〞買餸，再回去整〝冰花鮮奶燉蛋〞，頭先老公來電今日會早放，平時夜食飯都食唔落甜品喇！老公食完飯來電話比我知去買煙，我話你咪買囉！我都係果句喇！

老公回來見到我就話〝嘩~你做乜口腫面腫？〞，邊有丫！我去照下鏡，真係喎！然後叫我一陣幫佢按下〝Pat Pat〞對上舊骨，佢今日係公司撞到好痛。老公食完飯就去眠一陣，話眠左會無咁痛，仲叫我一陣叫佢，我話唔叫費事勞氣，又係叫極都唔起，又未洗白白，又要等頭乾先瞓，真係激死。

是日晚餐：

洋蔥餐肉炒蛋：晏晝我用剩餐肉，所以我就加D洋蔥來炒蛋，老公都話好味。

麻醬洋蔥炒牛肉：做法與〝麻醬洋蔥炒肥牛〞一樣，我只係改左用牛肉。

炒菜心：係〝百佳〞買餸，去菜檔買菜心苗，但師奶們話呢隻大條既都好食，仲話好甜，又唔好食返來搵佢，見佢地誠意拳拳，所以就買左。我與老公覺得好食和甜，咁大條都唔老冇渣。

菜乾瘦肉湯：係尋晚飲剩的。

無核提子：我買既時候睇到$9.9，到埋單時覺得咁多既，睇下張單先知，原來係$9.9/磅，真係大意，呢pack提子成$16.6。

〝接送咭事宜〞

我都唔明阿B間學校攪咩既，娣婦做左2張接送咭，接送咭係放係學校，每朝送小朋友回校，就會由老師交到家長手中，放學接小朋友時交回就可以，其實，若然你經常出現冇都可以。

尋日我去湊阿B冇拎接送咭，因為我由屋企行路去阿B學校，順路過回娘家拎接送咭，再去學校，這樣會行雙重，費時失事。回娘家後我就拎左張接送咭預備今日湊放學時交回老師，我亦已通知娣婦明天你就不用問老師拎接送咭。

今日阿媽帶阿B飲完茶，就回學校，但學校竟然話冇接送咭，這第二次咁講，所以我就向阿媽了解一下情況，本來我諗住去學校一趟，後來娣婦來電，佢話另一張咭原來Keep係學校既文員到(學校得一個文員)，真係火都滾，有乜理由得個文員知，緊係要學校每一個職員都知架喇！娣婦話回家會同佢地講下次咁既情況，就向文員取咭，咁都係一個辦法，但係責任唔應該係我地果到，之前娣婦都話個校長和文員拾下拾下，今次令教到喇！