戒煙日‧戒脂日

近日老公話戒煙，但佢仲有幾包煙，所以佢從今開始就戒煙，不過，佢都要我今日開始戒脂。尋晚已叫我將D煙收埋，但我話邊可以一下止唔食架！都要慢慢減格，我都冇理佢。尋日話有除左要幫老爺舖地板外，仲有兩件事會實行，就係老公戒煙，我戒脂嘞！

今朝老公又叫我收埋D煙，到出門口佢真係唔拎煙喎！我叫佢拎定以備不時之須，費時到時又要嘥錢買。最後老公咪有食，一食完早餐就吃左一支喇！黏地板時又吃，佢話戒煙要收埋D煙架！唔可以被戒煙人士睇到，推卸責任我話係籍口。今日都比平時食少左，戒都要慢慢來，正如我減肥一樣，不能迫得太緊。

我與老公吃完早餐就行去搭巴士，但係搭既係3坐位巴士，不論什麼位都窄到死，又唔知點解每個站都好多人上車，我又肥喇喎！要縮埋一舊坐，攪到我肩頸痛上加痛。

老爺已抺左地下兩次，因為要抺走灰泥才可舖地板，我去到再埋多半間屋就開工。每人都有工作岡位架！我唔識呢範當然就比較〝他條〞D喇！我都有幫手黏幾塊地板，但黏到頭髮都有，老公就叫我一陣坐埋一邊得嘞！

我：派派派、踩踩踩、抺抺抺
老公：刮刮刮、黏黏黏、查查查、畀畀畀
老爺：刮刮刮、查查查、抺抺抺

呢罐地板膠個蓋比較難開，但都難唔到老爺，因為老爺以前做地盤架嘛！

起初要用膠板度好個位先黏，老爺搽膠水，我派地板比老公，而老公就黏地板，淨返D邊位要畀就由老公操刀，我與老公就用火水輕輕抺下地板D膠，不能浸得太多入隙縫到。

屋內3個人得我一個夠份量，所以我又負責踩實個地板，老公聽到聲就問我〝係咪跳舞減肥呀？〞，大家個鞋底都黏滿膠，黏淨個大門口就落去食飯，食完再攪。

今日〝大快活〞有炸脾，老爺食叉燒米，我和老公都食炸脾加碗米粉，但我要既肉絲米有洗碗布味，老公話冇就用佢既辣肉醬米交換。

返到上去老公才記起漏左買間尺，又唔一早同我講話買，同我講我實記得。老爺叫我落去買，話當減肥，老公又話唔駛，老爺又話有好多野要畀，因為門口個位太不規則。其實，我真係唔想去買架，我對小腿有少少抽筋，而對腳跟之前著完高跟鞋好痛，但我都係落左去買。

我行約十分鐘到達商場，都未入文具店老公就來電，要買多罐地板膠，但又話好貴，咁我要搵櫃員機先，都未講完老爺就出左門來搵我。等老公時見到商場有隻〝Kawai〞公仔，我影既時候有好多人係前面，到我影完人影都冇。

我地買左間尺，又去左街市既五金舖買地板膠，但只係得萬能膠都可以黏地板，返去黏埋少少就收工。等埋下星期送床來就搬得入住，老公已七十幾歲，所以傢俱全部都待從簡，只係買D基本野！因為老爺話都冇幾耐，買左好快冇用，所以我都唔知講咩好。

阿嫂、肥仔和娣婦帶左阿B去街，原本係出街食，後來改左買外賣回去肥阿哥家吃。我地每人一份Mos Burger餐，再配薯餅、炸蝦或炸脾，我與阿嫂吃〝照燒汁漢堡〞，其他人都係食〝芝士牛肉漢堡〞。

仲有去左〝活壽司〞買壽司回來吃，佢個packing好得意，好似古時包袱咁。

肥阿哥個魚缸有自動餵糧機，亦有個框框住D糧，一餵糧條棟仙就食，但佢唔比其他魚仔吃，有魚想食就啄佢，糧就被佢一條吃光，後來肥阿哥自己人手再餵多次，肥阿哥話放條皇帝去治條棟仙，但點解皇帝要坐監呢？

國慶放煙花，我與老公都冇興趣，佢地上晒天台睇，我與老公就返歸。對此我一向都冇興趣，尤其是N年前係〝白天鵝賓館〞睇過一次，只係係前面條河放，煙花近到D火舌會跌入露台，隨時會辣到，而且放既時候好震撼，講野都好難聽到，之後更加冇興趣，因為我已睇過一次咁震撼夠了，留給我美好回憶。