薄皮的小孩

14 October 2008

今日老師同我講左阿B係學校既野。

第一件：
尋日我忘記左拎阿B既被舖回學校，所以今日才拎回去，咁樣就出事嘞！
今日阿B係午睡時，由於以上原因阿嬸未鋪得切阿B張床，所以阿B就搵唔到自己個竇，佢就當其中一個小朋友張床係佢個竇，咁樣佢就坐左落去。

之後張床既主人得3歲就同阿B講〝呢張床唔係你架！〞，跟住阿B就扯人頭髮嘞！跟住班主任同阿B講〝你咁樣唔啱架喎！〞，都係講道理啫！阿B就喊，跟住就死死氣返回自己個竇瞓 (我諗嗱嗱淋鋪比佢)，所以今日係唔駛人陪就瞓左。

第二件：
今朝唔記得咩事要排隊，阿B冇排，然後班主任話要排隊之類既野，跟住阿B又喊，之後就真係企定定唔走。

我同老師講阿B係好薄皮，佢一話就喊。阿B係家中又冇人同佢爭野玩，又唔駛排隊，又冇點曳，所以都好少話佢。阿B有時玩都會扯我地頭髮，我見到實會鬧佢和打佢隻手架！

阿B又係邊睇〝史迪仔〞邊拎住佢，但我一遮住佢就左擰右擰。

之前我係香港迪士尼買左隻〝史迪仔〞，
佢唔要寧願要果隻咬人既〝史迪仔〞，哼~唔識貨。

我要佢望住鏡頭影相，但佢掛住睇電視唔理我，
所以我就熄機和電視，咁佢就敷衍影左呢幅相。

呢兩件就係星期一拎回家做練習既道具。