老爺有Face@2008中秋節

欲知前提如何請到：〝我與〝愛Ying〞第一次見面〞

我與〝愛ying〞見面後就趕去與老公會合，再去找老爺食飯。今晚我與老公約左老爺食飯，老爺請埋佢個好朋友兩公婆一齊吃。

我和老公搵到老爺後，就去搵定位等朋友兩公婆來。我地坐低後，老公比左盒用餅老爺，而我就將我整既〝迷你月餅〞和〝米奇鳳梨酥〞送比佢。我地又諗下叫咩餸，等一陣來到問下佢地，咁就唔駛又要攪一輪先有得食。

我同老公講可唔可以趕得到回去睇〝家好月圓〞呢？老公話趕唔切就上網睇囉！等左一陣兩公婆都到達，老公又送另一盒月餅給他們，而我又拎我整既野比佢地，佢地話〝你點整架？〞，我有焗爐用焗爐整既！當時我見到老爺笑得好開心，頭先我同老爺講時佢都冇乜野架！但當有人係到就笑到四萬咁口喇！

老爺話老公與朋友男係同輩架！所以我應該叫朋友女做〝阿嫂〞。朋友男都成五十餘歲，嘩~老公你咁高背份架！

我order老爺最喜歡既〝梅菜扣肉〞，點知果到冇扣肉，老爺有點失望，唔緊要下次有機會等我下廚煮，而我想吃〝琵琶豆腐〞又冇，佢就推介左〝炸蝦丸〞，味道都OK。

大家邊食邊傾下計，食完又繼續傾，傾左約1小時我地就走，不過，佢地繼續傾計。起身走後老公話而家走都應該睇到既，我心諗〝頭先又話唔睇既？〞。返到去真係剛剛好，歌都未開始唱，我與老公就靜靜坐下細心欣賞。