懷舊通宵唱K之夜@Green Box

8 June 2008

尋日朝5點幾訓十點幾起身，世估唔到今日去唱K一唱就通頂，足足唱左9個鐘，其實，大家都冇諗過通頂，但又冇人提意走，所以就通左勒！

今次有我、老公、熊貓姐姐、開心果姐姐、至Fit姐姐、翻版盧冠廷 (至Fit姐姐老公)、高達叔叔，都有問過同屋住，但佢有事唔嚟！今次與上次〝不停飲飲食食@Green Box Karaoke〞一樣都係不停咁食，我地唱完仲去飲埋早茶先解散，除左〝打馬吊〞會通頂去飲早，唱K都第一次，又攪到朝早7點幾先訓，老公要等頭乾成8點幾先訓，不過，就唱得好開心。

開心果姐姐見到我就話我肥左，我都諗住食埋星期二果餐就開始減，因為之前睇到blogger個減肥餐唔錯又可以食得好豐富，這個餐單開心果姐姐好耐之前都比過我，原來真係得既，所以我又想試下先。

之前個髮夾爛左係〝AMP〞買，而開心果姐姐又想睇電腦，所以唱K前我地約去〝AMP〞行一陣，但佢屋企仲未換新完冷氣，行街就得返我地2公婆。

我買左個新髮夾後就幫果心果姐姐睇電腦，之後就搭車去〝淘大〞，見有時間剩就去〝直銷中心〞睇定D傢俬價格先。

開心果姐姐來電仲未整完冷氣，好大可能嚟唔到。之後熊貓姐姐都來到，我帶左佢去睇我地睇中既衣櫃和我喜歡既梳化，張梳化熊貓姐姐都話好，而且個枕頭位有得調教，我和熊貓姐姐都好鍾意。

跟住我地就去拎房先，我地當然係唱〝K Buffet〞喇！平時都冇咩好食，今次仲更加無啖好食，大家都係貪呢到唔會趕人走任唱。

至Fit姐姐、高達叔叔要做節食完飯嚟！開心果姐姐後期係屋企吃埋飯來，我地唱左少少新歌後就唱80、90年代既歌，但唱得最舊莫過於我和至Fit姐姐，至Fit姐姐唱鄧麗君既歌，因為佢暑假回鄉表哥和表姐聽，所以佢就識，而我就唱阿媽和老豆年代既歌，因為中學年代興係屋企唱K，有時又與街芳互去大家屋企唱，所以我就識D好舊既歌。

至Fit姐姐老公~翻版盧冠廷佢唱歌好勁，由於佢有時要返內地工作，所以佢專攻刀郎和內地歌手既歌~真係唱得好Rock，佢把歌沙沙地有D〝家驅〞feel，而且佢唱盧冠廷歌把又好似架喎！成班人都玩得好開心。

上次玩擦擦卡有2碟小食和3罐啤酒，大家又玩得高興又點止咁少，再叫多個同上次一樣既啤酒套餐，邊玩骰盅邊飲酒，每位男仕都飲左5罐啤酒。

雖然，至Fit姐姐係食完晚飯嚟！但佢等緊炒飯，因佢食過有次宵夜有好好味既炒飯，可惜今晚都係冇只得呢兩款小吃。

後來我地叫左88蚊任簡3樣野食。

唱到5點半打洋，我地就行左去隔離既〝明星〞飲早茶，果到開左門，但未有人返，我地諗係D師傅開門。

我地tick定點心等有人返就落，全部都係熱辣辣架！原本高達叔叔一陣會來我地家整野，但咁早都唔知佢嚟唔嚟到，我都諗住整包架！不過，而家咁我諗都唔得架喇！一切都係要訓醒先算！