天氣令我〝痛〞

近排D骨都好痛，可能天氣影響，但今日起身痛到難以形容，我梳洗完坐左一陣都係決定唔湊阿B，我打電話回家通知阿媽，但去左飲茶，於是通知肥仔後再通知阿媽。

我等到老公返公和寫埋尋日篇Blog後就去訓，我訓到約1點起身，仍想訓，但怕再訓夜晚就訓唔着。

起身見肚餓吃左個杯麵，但今次係〝多謝惠顧〞，之後check電郵，嘩！有好多丫！，Facebook又有好多mesage，之前兩個〝情侶電話〞又未填保用証，於是我就網上登記做保養，就咁樣搵到3點幾。

痛一直都未有退減，我要整〝阿茂整餅〞嚟分散注意力就唔多覺痛，所以整左想整好耐既〝合桃酥~迷你版〞~好味。

頭先開雪櫃見到星期日整蛋糕用剩兩個〝蛋白〞係雪櫃，所以我就用嚟整左〝蛋白蛋糕〞，但太耐冇整都唔係好記得，我又冇橄欖油用左粟米油代替，希望食得喇！〝四大長老〞好鍾意食這款蛋糕架！記得上次整double份量佢地4個都唔夠食。

未倒扣時個表面好靚架！有一次唔記得倒扣個蛋糕攪到好醜樣，整餅既時候真係唔覺痛，但整完又開始痛。

之前食過肥阿哥係公司訂回來既〝紫菜〞，有次阿嫂問〝要唔要紫菜？〞，但我不在家，所以娣婦幫我order左2包。晏晝同肥阿哥來電話有貨，同埋忘記叫我地去佢家試〝肉鬆吐絲〞、〝芝士條〞，佢話〝肉鬆吐絲〞~係不錯(國語)，突然講國語應該味道唔錯，不過，佢話下一水應該加價勒！

肥阿哥話我好似〝七老八十〞咁，叫我做多D帶氧運動，仲叫我得閒去佢Club House做Gym，咁就唔會週身骨痛喇！

傍晚時份，突然落雨、閃電、行雷真係嚇死我，即時諗到有老公係到就好喇！我好易嚇親，有時係老公居企電話響、隔離鄰舍大力D關門我都會彈起架！

我聽到開門聲就出去迎接老公回來，佢行到入屋問〝你整合核酥丫？〞，我望一望張櫈就問〝你又知既？〞，然後我見到老公視線向前望，而佢前方係電腦，咁我就知佢見到我打緊Blog咪知囉！我問佢試唔試？佢話夜D先食。

晚餐食〝味噌湯烏冬〞，今日老公好攰我就好乖自動去洗碗，平時老公會幫我洗，因為佢話我有〝主婦手〞和煮得辛苦，但我都唔比佢洗都係自己洗返，但自從我〝阿茂整餅〞、寫Blog後都好少同老公爭洗碗，因為我要整野丫嘛！

食烏冬老公鍾意係港鐵站買魚蛋、牛丸‧‧‧回來做餸，佢怕收工去到已關門，加上老公頭好痛有D暈，所以其他同事未走，佢就係8點鬆D走先，可惜去到都係收左。我想食雞腳和飯糰，咁老公就轉食滷味和飯糰。