又想‧又唔想

尋日忘記買糖霜，頭先去過〝百住〞冇，但買左香蕉預備可能整〝香蕉蛋糕〞，之後又去左〝惠康〞都係冇，註定我唔駛整架喇！疊埋心水整〝香蕉蛋糕〞算啦！

頭先係〝百佳〞買左野，所以高達叔叔拎住D野係〝惠康〞門口等我地，〝惠康〞門口有扭蛋機，佢等我地既時候去左扭，第一個扭左〝鬼魂〞，佢冇十蚊餅就問老公有冇，之後扭左個透明藍色〝孖寶〞係佢想要，咁佢就比左隻〝鬼魂〞我，我係〝Wii~孖寶賽車〞我都係用佢架！

我地返到去已經3點幾4點，我仲要整晏晝食，食完先算！但個心好想整，高達叔叔話次次都見我整野，今次咪抖下囉！老公就由我自己話事，我食完野，見真係時間無多都係唔整，但又不停講想整，心個不斷咁鬥爭，又搵下有冇簡單野整，但好似簡單既都比我整晒！我又唔想重覆再整。

我爭扎左好耐都係冇整到，我諗住7點幾煮野食，食完就煮麵比佢地食，因為時間真係唔許可。

尋晚11點幾去到肥阿哥家，預備睇零晨2點45分〝荷蘭vs.俄羅斯〞，肥阿哥問我明天去唔去游水？因為佢有朋友帶埋小朋友嚟游，今晚要睇夜波和明天高達叔叔會來整模型，所以都係唔游喇！

肥阿哥與阿嫂都冇睇就去左訓，而我睇左半場都有D眼訓，所以係中場休息一陣叫老公開場再叫我，點知我好攰老公叫我訓唔好睇。

完場老公就叫我起身走，然後我又叫肥阿哥起身關門，因為佢家一係用鎖匙、一係就要係屋內閂門。老公好怒氣，因為荷蘭輸左，原本1：1打和，輸係加時既時候輸多2球，佢講左好多賽後檢討，總之好怒氣。

今朝十點幾肥仔又來電問我去唔去游水？但佢係唔游既，我有事唔游喇！高達叔叔嚟左一陣就去食野，老公都要我一齊去，人地食左減肥早餐諗住係屋企等佢地電話，之後join埋一齊買野架嘛！

佢地等食期間我就去左睇衫，嘻~嘻~我買左一件衫丫！老公一知道就話〝你前幾日上網訂左件衫咋喎！〞，係丫~件衫好平咋！平~唔駛錢丫！話左幾句就冇事，因為老公錫我丫嘛！

尋日肥阿哥和阿嫂冇試到〝墨西哥〞，但今日高達叔叔試左都話OK。