偷襲‧酸在那裡？

今朝係屋企廚房成個人滑倒，阿婆話嚇死佢，因為地下濕，感覺好似有D油，攪到右邊手和腳都紅晒，不過好快冇事，好在係我滑倒，若然係阿公、阿婆就弊喇！

近排個人又開始好攰，今日又係我訓左幾次阿B都未訓，就係因為咁就差D有流血事件。

話說我係地下張墊到訓，阿B拍過我一次，再隔一陣突然感覺有人襲擊我，我張開眼原來係阿B用雙手拎住樽寶礦力揼落我塊面到，我拎左寶礦力再訓，但唔敢訓著。

我又張開眼，今次阿B成架小巴係我塊面巴上空，阿B見到我望住立即放低係我前面，之後我又訓，然後我又張開眼，今次我見到佢拎架〝法拉利〞，嘩！咁大架實到我爆缸，於是我就起身開支寶礦力比佢飲。

尋日整左個〝烤焙乳酪蛋糕〞、〝藍莓馬芬蛋糕〞，今日阿婆見到一大袋蛋糕好開心，人人食過都話好味，阿媽與老公一家都話D藍莓酸，而阿媽與我一樣都唔覺得酸，佢仲話今次最好食，。

朝早我同娣婦講晏D我會試下〝烤焙乳酪蛋糕〞，之後話佢知成功與否，若然成功我地就唔駛買Tea食。

我切左一件仔睇下，嗯~應該熟。

我食〝藍莓馬芬蛋糕〞時唔覺藍莓酸，但食〝烤焙乳酪蛋糕〞時就酸酸地，咁樣問題係藍莓抑或係落左檸檬汁酸呢？

肥仔與娣婦都話酸，之後娣婦分開試食，佢話個餅身酸。我要再整試，睇下係邊樣酸。