資料搜尋@7‧1北上

晏晝阿公炒飯，炒得靚唔靚呢？

前幾日與熊貓姐姐通電講除上次〝懷舊通宵唱K之夜@Green Box〞外都冇聚會，我想去下佢家整下包、餅，平時得老公一個人吃，D野過左氣先拎到回家有人吃，所以我就有咁既想法。

講講下熊貓姐姐又話不如去按摩，秉承前2年既習慣，因為我地連續2年7月1日都北上去按摩~吃、喝、玩、樂，所以佢想今年都係咁，我諗未來幾年都會係咁架喇！都好去鬆下、玩下、開心下，可惜老公未知要唔要返工。

我同老公講想去〝東門~廚安居〞，之前睇好多Blogger講D野好平，我都想去睇下，老公話內地同事話本地人都唔敢去〝東門〞果邊，因為十個人有6、7人係抓手、刧匪。我同熊貓姐姐講佢都想去，佢叫我同老公講唔怕，坐的士去到門口咪得囉！

星期日，高達叔叔來我地家砌模型時，佢講〝7‧1〞北上睇波，因為佢喜愛的〝德國〞未出局吖嘛！我問〝熊貓姐姐有打比你咩？〞，佢話冇，咁我就話左佢知我地既計劃，佢當然讚誠喇！

尋日老公同我講可能唔駛返工，於是我就通知熊貓姐姐，咁我地又傾下搵埋其他人去，然後分配好老公與熊貓姐姐分別聯絡其他人，我地又講如果得我、佢、老公、高達叔叔4個人咁點呢？基本上每次活動都我地4個係膽睇下拖邊幾個架啫！我怕會唔會危險D呢？熊貓姐姐又唔怕，因為佢間中都要與男朋友阿媽返廣州，咁又係又有咩好怕呢？不過，我怕老公好似上次咁〝回歸~深圳之旅 (上集：1-7-2007)〞被乞丐幫小朋友攬住隻腳唔走得，差D朋甩褲添丫！

熊貓姐姐與開心果姐姐通話，但開心果姐姐家中有事，我聽到後都覺得痛，希望快D無事喇！老公就與高佬叔叔和同屋住聯絡過，高佬叔叔若然〝7‧1〞唔駛洗工就與女朋友與我地一齊去，佢要星期六先知，而同屋住就要遲D覆，因為佢要搵人湊2個女。

上年北上大家都唔熟路，所以我一早已經上網搵晒資料，安排好晒去邊到，雖然，我花多好多時間去做資料搜集，不過，緊係到時就唔係依我安排而行喇！有D仲取消左添！但係大家都玩得好開心，最緊要都係咁啫！

今日我攞回上年既資料和上網睇過下地圖，我都唔打算有咩安排一切順其自然，最重要睇下大概位置係邊咪得囉！