休閒@風神

尋日傍晚時份已收到消息今早應該會掛〝8號〞，但夜晚已經掛〝8號〞風球喇！老公話明天都落喇！我問老公〝你幾多點落就唔駛返丫？〞，老公話冇架喎！一落就要返，都唔知咩公司嚟架！話就話係日本人公司，所有福利都唔似日本人公司，反而做野就似層壓式，按本字辦事，永遠一成不變。

今朝7點起身開收音機聽仍然係〝8號〞，我就再訓過，但係咁既天氣我既肩頸又點會唔痛丫！我典左好耐先訓得返，不過就每一個鐘醒一次囉！終於訓到9點幾就起身，然後開電視繼續留意颱風動向，我見咁早就開始整〝圈圈餅乾〞。

我一直睇住電視留意天氣由紅雨轉黃雨，電視話中午前會轉掛〝3號〞，係11點就轉左〝3號〞喇！我叫老公起身預備返工，佢例牌訓多陣先起身，我未焗完〝圈圈餅乾〞就去食晏先，回來再焗，係老公梳洗期間發生左D野。

跟官咁耐都知官姓乜，我見佢梳洗，心知佢冇諗過一陣同我食野，但我係都要問下〝你一陣食咩丫？〞，佢話買野返公司食，我聽到就好嬲，頭先你未起身我肚餓食左包餅，我諗住得埋你先一齊食野，但你而家咁講即係冇諗過陪我食野喇！我知你趕住返工，不過，都可以一齊食完先返工掛！我扭左一陣就去食野勒！女人係要氹架嘛！嘻~嘻~

食完野諗住陪老公等車返工，但頭先等食等左好耐，所以老公轉搭港鐵再轉小巴，我送左老公去搭港鐵就自己去〝百佳〞買雞又蛋，順便逛下，行行下就打比老公〝我幫你買報紙好唔好？〞，老公話〝好〞，因為老公返工前買報紙，只係有食早餐時有時間睇，之後就要返到屋企先可以再睇，我唔想佢又要孭多份報紙。

我係街上見到有好多人趕返工，就覺得自己好幸福好似〝少奶奶〞，我可以慢慢行，又去買下野唔駛趕返工，但係呢D日字要付出代價架！

我係〝百佳〞見到呢隻牛油仍然減緊價，仲係$12.9，雖然屋企仲有2舊，咁平都掃多一舊先。然後，我又見到雞蛋20隻都係$12.9，咁抵就算用唔晒都可以拎返屋企實用得晒喇！

返到去就焗埋D〝圈圈餅乾〞，跟住又整多個〝海綿蛋糕〞，這個〝海綿蛋糕〞係我之前提供比〝Blog友仔〞，但係自己未整過，所以整下。

頭先有2個蛋白剩，我又見時間尚早，所以又再整〝蛋白蛋糕〞。

晚餐又諗唔到食乜？都係煮又快又簡單既〝瑤柱粥〞，老公又買左〝吉吉〞和我最鍾意既雞腳。