突然~壞心情

今日整左2款蛋糕〝烤焙乳酪蛋糕〞、〝藍莓馬芬蛋糕〞，但係〝烤焙乳酪蛋糕〞要冷藏半日，所以要明天先知結果。

我係整蛋糕之前和前段既心情一直都好期待製成品面世，所以心情一直都好興奮和開心，可怕一切心情就係後段起左變化，但都唔係維持左好耐。

今日老公唔駛返工，又無街去，但下星期可能連〝端午節假期〞都要返工。咁樣又係我〝阿茂整餅〞既時候喇！但未有心水整咩！而高達叔叔停左工咁耐趁今日又嚟開工勒！

尋日高達叔叔話十點、十一點差唔多到，我見11點都未到又肚餓就吃杯麵先，食左一半就到，老公又未起身，所以高達叔叔買埋報紙比老公上嚟砌住等。

老公12點起身去〝殊殊〞時差D撞跌成盒模型，高達叔叔話老公好似〝盲人〞咁，因為佢起身到撞到個盒都係冇開過眼既！我話撞跌晒仲好等佢可以醒晒！之後我就唔比佢再訓梳洗去食野。

我吃〝龍蝦忌廉汁雞皇飯〞味道唔錯；老公與高達叔叔都吃〝干炒三絲銀針粉〞。

頭先睇書決定整2樣野，有D材料食完野就去買，又要去〝惠康〞入貨，其中一樣係〝酸忌廉〞，我去〝果子〞冇，而Miss果間都冇，但Miss話去地鐵站〝百佳〞應該有，若然冇附近都冇架喇！

我係〝百住〞發現呢隻〝無鹽牛油〞平過平時D好多，只係$14.9，若有〝易賞錢卡〞仲平1蚊添！就與〝首選牌〞同價。

我地食完野、買埋野又入埋貨攪到成4點幾先返到去，所以都好晏先整餅，由於冇時間睇一次食譜先整，所以整〝烤焙乳酪蛋糕〞差唔多完成時都未要用焗爐以為唔駛，仲同老公講原來唔駛焗架！邊整邊睇原來係要既。

我係整既時候都好順利，就係焗既時候開始心情轉壞，因為我焗左好耐都唔熟，又夜又仲未整〝藍莓馬芬蛋糕〞，所以個人有D掹癐，我用左食譜幾倍時間焗，已經焗到表面都燶燶地都好似有少少黏住牙韱。

呢個食譜好多時都係要用微波爐，但我得焗爐，佢酸忌廉要拎去叮，我就放入焗爐，但攪極都唔得，但我都唔理照倒酸忌廉係面。

跟住到整〝藍莓馬芬蛋糕〞，又係冇時間睇一次食譜，邊做邊睇。廚房冇位插電動打蛋器，於是我就用手打，但實在太攰，最後我都係用電動打蛋器轉去廳整。

整整下又發現有D材料未落，所以D步驟都唔係好〝arm〞，攪掂焗得，我用牙韱吉睇下熟唔熟喇！一吉支韱~〝血丫〞，不出一秘就諗到吉到藍莓啫！但我拎去同老公講，佢一D奇怪都冇就話〝你D藍莓嚟既！〞，丫~咁醒既。

我地食完晚飯再焗過，老公話D藍莓酸，可唔可以唔要？我焗剩一個佢先試，所以得一個係冇藍莓，頭先都叫佢試又唔試。雖然，又係焗得比食譜耐，但係都好成功，最重要係老公話〝好掂〞。

除左〝藍莓馬芬蛋糕〞好掂外，我地食晚飯果間都好掂，碟菜係叫2個餸送的，我地order左〝中式牛柳〞佢地話酸左D，但我一D都唔覺；〝椒鹽排骨〞即係豬扒，豬扒好好味，老公連配料都食埋。

高達叔叔終於砌好左喇！但佢要回家噴油，我比肥阿哥模型相高達叔叔睇，原來肥阿哥都有砌呢隻，不過佢係砌白色1：100，而高達叔叔係砌黑色1：60，所以大好多。