漫長換衫記

今日食完減肥餐後，第一次出動，我約左熊貓姐姐食lunch，之後去〝橘子烘焙〞買野，然後去換衫，因為尋日買果件衫有D問題，左邊領至手袖與右邊領至手袖係唔對稱相差半吋有多，而且前領位的裡車得唔好會露出來。

今日阿B全程都係要抱，真係抱到我手都攰，又要拎住話輕又唔輕既烘焙用品，攪到個人又好〝呢 hea〞，流汗都幾乎冇手抺。

我帶埋阿B12點鐘就出門口，點知屋企附近爆水管架巴士要兜路，然後又遇上塞車，好在早出門口咋！唔係就‧‧‧

我地去到目的地，並已睇左吃咩！我搵到位就通知熊貓姐姐係邊和吃咩，我帶住阿B要熊貓姐姐幫我買。晏晝搵位時，咁〝arm〞平時坐開個位有人走，所以一講熊貓姐姐就知我坐邊，我每次都好彩可以坐翻同一個位到。

平時食開既〝鮮茄牛肉煎蛋飯〞今日冇，我就叫左〝粟米肉飯〞，汁仲多過飯。

尋日我買唔到糖霜，今日我就去左〝橘子烘焙〞到買，我成日都想整愛吃既〝龍鬚糖〞和〝鳥結糖〞，所以我買粟膠，平時食譜通常都係見人用魚膠粉又順手買埋。

嘩！今日換衫真係過得好漫長，我食完飯坐港鐵去換衫，我地企係月台等車，有車嚟阿B就喊喇！之後約2點就到目的地，舖內有人但執緊衫。

半個鐘後再行去都係執緊，行到我都好攰，我就帶左阿B去公園玩，我一個人帶佢去都好怕有意外，你知喇拎住咁多野又要睇住阿B好難兼顧架嘛！不過，都冇事發生，仲玩得好開心添！玩左半個鐘再行返去。

離遠見到都仲係執緊，我都硬住頭皮敲門問幾點開，回答3點半，哎~仲要捱多半個鐘。正當我想打比老公時，老公就來電勒！我匯報現時情況和一陣可能要買多件衫，原因係通常換衫都係要3、4點打後，因為未開單，而第一單生意就換貨對人來講係〝唔老嚟〞呢D係行規，老公聽到後話〝咁下次唔好去果到買〞，真係比佢激死。

我冇預到咁晏都未返屋企，阿B想食奶，原本我帶左餐奶比阿B，不過唔想拎咁多野，所以都係放低左。靈機一觸，阿媽話我歲幾已戒左奶，我飲〝維他奶〞做代替品，所以我即係買左包〝維他奶〞比阿B飲。

終於開左門喇！我一入到去表明立場想換衫，不過，我都有問幾點可以換。

售貨員：6點先可以換。

我：若果我而家買一件衫，咁可唔可以換？(我真係等唔到咁耐)

售貨員：特價冇得換。

我：我唔知係咪，不過，尋日掛係收銀後面，但係件衫‧‧‧。(我講埋件衫有咩問題)

售貨員：係~特價，只可換衫，不可以換款。

我目的都係想換衫啫！之後我就努力睇衫，我睇時阿B又睇，但只係簡到尋日睇中左既另一件，跟住就即刻回家。