12日醫院減肥餐單~Day 1

燃燒指數：0磅              燃燒總數：0磅

燒脂指數：0%               燒脂總數：0%

近排幾乎見過我的朋友都話〝喂~你肥左喎！〞，其實，成日都想減，但一直都冇決心去做。之前開心果姐姐都有比過這個減肥餐單我，不過，覺得好似好麻煩，所以冇實行，有次無意中比我見到有〝Blogger~a small potato、Miss Jubie〞都係跟這個餐單減又work，而且又食得又豪又豐富添！我就下定決心跟〝Miss Jubie〞提供的減肥餐去減。

朝早同娣婦講過叫肥仔試下個減肥餐，但娣婦話佢實唔肯，實話佢要勞動，我都係咁諗，估唔到夜晚肥仔見我食牛扒就‧‧‧

肥仔：問點解我冇？
我：呢個乃係減肥餐。
肥仔：點解唔預我？有扒食嘛！
我：今朝都有同娣婦講過，不過，佢話你實唔肯，但早餐你實唔夠食。

今日係第一日，我以為阿媽會極力反對，只是說左幾句，而阿婆就話〝好少少又減肥〞，因為四大長老喜歡我肥。以前曾經由142磅減到101磅，因為有朋友仔與我一齊努力、互相篤束，冇做野之後又慢慢膨脹。

果時四大長老話我面色差、身體又差，其實，一D都唔差，佢地成日都話瘦就係唔靚，根本係傳統觀念和偏見，不過，以我5呎3-4吋當時算瘦，因為人人見到我都話我瘦，都勸我唔好再減，其實，我都唔想，但當時唔開心，所以肥唔到。如果要我好似以前咁減，而家既我根本冇可能。

今次都想好似以前咁成功，成功左最開心係老公，因為佢想見回瘦的我好耐。以前減肥餐有西柚我都不會選，要我吃西柚真係好慘架！又酸又苦又澀，但我一定要食一定會成功既！

嘻~嘻~呢個係我之前係〝惠康〞換可以磅重和脂肪架！不過，都有3個月冇磅，因為唔想面對現實，終於今朝要上磅比前3個月肥左成20磅，而脂肪只不過多左1.5%，我諗係就到週期性不適，要為它作準備，所以水腫。(自我安惠)

今朝係老公屋企樓下凍肉舖買牛牛，之後又同阿B落〝惠康〞買生果晏晝整沙律。我係〝惠康〞同個職員傾左好耐，講湊仔與煮餸，佢都以為阿B係我個囝，我話佢知我今日開始食醫院個餐單減肥，佢又想減，但佢好fit唔駛減，佢話想減肚腩可能生完個肚腩大，所以傍晚時份拎左餐單比佢。

早餐，我煎左煙肉，再加少少牛油煎蛋，我煎左隻太陽蛋和包蛋。

晏晝，不過，忘記食肉類，但吞拿魚應該都算肉類，食完之後又未飽。

我就將牛仔骨溶雪，再用少少牛油煎嚟食。

晚餐，塊牛扒太大，我切左少少留返明天，我封煎左塊牛扒，再用肥媽教既方法用錫紙包住等佢本身熱力整熟就唔會〝鞋〞喇！

雖然如此，不過，本身塊扒唔靚好〝鞋〞，下次都係唔去凍肉舖買cheap嘢！去返〝惠康〞買。

我減肥都有煮〝洋蔥豬扒〞。

減肥餐單來自：〝Miss Jubie〞

(醫院減肥餐單)
如遵照餐單食法，在兩個半月內(大約75日)應可減掉52磅。
(這餐單是供醫院有心臟問題而需要快速減肥去進行心臟搭橋手術的病人)
這餐單要連續食12日，再停2日。如有需要再重覆食12日，再停食2日，如此類推。
在午餐及晚餐中除了西柚外，所有份量也可隨意進食，直至飽肚為止。

早餐:
半個西柚(可榨汁)無煻  2隻雞蛋 (任何煮法也可)  2塊煙肉

午餐:
半個西柚(可榨汁)無煻  沙律(醬汁不限)  肉類(任何煮法可)

晚餐:
半個西柚(可榨汁)無煻  肉類(任何煮法可)以魚類為佳

以下二選一:
1. 綠或紅蔬菜(可配任何調味，牛油也可)
2. 沙律(醬汁不限)
如有需要每餐只可飲一杯低咖啡或淡茶
小食: 一杯蕃茄汁或脫脂牛奶

遵照之規則:
1.      不要私自減去餐單上任何食物，特別是煙肉及沙律，因此餐單是以上各種食物混合產量化學原理去燃燒脂肪，而西柚是非常重要的，因它是這餐單的觸法劑，是它引領整個燃燒過程的，故不可缺少。
2.      減少咖啡數量，因為它會影響胰島素從而減慢整個燃燒過程。
3.      除以上餐單外，不可進食其他食物或飲品(水除外)。如你遵照以上食法，你應該不會感到肚餓。
4.      不可食甜品、麵包

蔬菜(不包括): 白色蔬菜、蕃薯、薯仔、白洋蔥、芹菜
蔬菜(包括): 紅椒、紅蘿蔔、洋蔥(紅或綠)、蕃茄、西蘭花、蘿蔔、靑瓜、黃瓜、椰菜、生菜、菠菜

後記:
你可隨意食任何肉類、沙律或蔬菜，也可以牛油核烹調，但必須完全減免糖及澱粉質這止能產生脂肪的食物。

成績: 以上餐單可成功為你10日內減去10磅。在正常情況之下，第一日是不會出現減磅，但第五日後會減去五磅，跟著每2日減半磅，如此類推。持續餐單直到至你要的磅數為止。