豉油卥水雞翼 (內附食譜)

今次我將〝豉油雞翼〞與〝卥水雞翼〞合併整出這款〝豉油卥水雞翼〞，由於我減肥中，所以誠邀阿婆和阿媽幫手試味。

肥仔與娣婦都話好食，煮左2磅雞翼，食剩得返幾隻，不過，老公就話麻麻，佢話唔多喜歡吃卥沒雞翼喎！

其實，製作過程與之前的一樣，只係在調味和份量方面有分別。

豉油卥水雞翼

材料：

雞翼                   2磅

調味料：

卥水汁                1碗

豉油                   1/2碗

老抽                   1/4碗

水                       3碗

蒜頭                   3-4粒

冰糖                   隨個人喜好

紹興酒                少許

雞翼飛水材料：

水                       浸過雞翼

蔥                       1棵

薑                       2片

做法：

1.            煲滾水，加薑蔥，放入雞翼，待水再滾立即熄火。（全程大概2至3分鐘）

2.            倒起雞翼，用水喉水沖雞翼，或加冰來冷卻雞翼，直至雞翼由外至內都冷卻即可。

3.            將調味料放入煲內，煲滾試味，記著一定要先調校好汁味。

4.            把味校好，待汁滾後放入雞翼再蓋上蓋，再滾起後加入紹興酒立即熄火，然後把蓋合上焗至食用時。(若然要翻熱只需煲滾後熄火焗一陣即可。)

備註：卥水汁可留在雪櫃內再用。