一跌歪左~

我起身見隻腳行得就如常去湊阿B，不過，隻痛腳就比阿B踩左一腳，又比阿B舊玩具〝click〞左一野。

今朝個心〝十五十六〞諗緊去唔去睇跌打好呢？阿媽休息明天要返工、星期六、日跌打師傅休息，如果再拖就冇人陪我去或冇得睇，加上一陣同阿B睇醫生都係要出街，經我細心考慮、分析後得出結果決定去睇。

我等阿B訓左，之後就去洗白白就同阿媽出發，係我地出門口時阿B就醒，我〝拿拿淋〞去開奶，中場休息阿婆就帶阿B去騎樓睇車，我地趁機〝靜雞雞〞閃人。

眼見等候的人不多，但等左半個鐘都未得，阿媽電話響阿婆來電阿B扭計，原本到個婆婆睇，佢聽到阿B扭計就讓我地先，我推卻左幾次，個婆婆話細路扭計好慘，因此接受左佢既好意。

阿媽攪掂到我，每次師傅都會問阿B係邊，今次都唔例外，師傅仲講笑添！

師傅：阿B呢？

我：佢唔舒服係屋企，一陣要同佢睇醫生。

師傅：嘩！你唔止半個阿媽囉！直情成個阿媽囉！醫生都同佢睇。

我：哦！唔係，佢阿媽今日公司食團年飯，平時係佢阿媽同佢睇架。

我向師傅講我尋日整親隻腳，整完肩頸到下半身要訓係到，我好驚~怕痛，未整我就嗌定先，咁又唔係大嗌咁肉酸，好似喊咁聲囉！師傅話歪左，我話腳眼和膝蓋都好似有D野，係丫歪左，而家應該好D，明天我要等阿媽放工後再陪我來覆診。

之後又急急腳回去接阿B去睇醫生，我地等左個半鐘，係等見醫生期間不停係診所外行又要抱住阿B，如果放阿B落地我又追唔到佢，阿媽間中都有抱，後來真係頂唔住就放佢落地，落地一陣阿媽又怕佢撞到，所以用孭帶孭起佢。頭先唔知係咪行得多隻腳開始痛，唔知明天隻腳會唔會腫呢？

睇完醫生，阿媽買左條褲比阿B唔〝arm〞要去換，臨走經過有手套仔賣，所以我買左對比同屋住個細女，一年多前我已買左一對比個大女，我唔會偏心一人一對。我買既時候阿B扭計唔肯跟阿嫲，我都冇睇清楚係影相時才發現對手套可以2用架。