阿B今日都係黐身，但無尋日咁黐，我5點幾先開始執埋尋日既手尾，其他又要押後。
今晚老公要北上食公司團年飯，所以7點未夠就吃飯。不過，今餐得阿公、阿婆、老豆、我和阿B，咁其他人去晒邊呢？阿媽返夜、肥仔加班、娣婦對鞋爛約左人食飯&買鞋，所以今晚好冷清，餸都好求其添！我炒左碟菜就開飯。
食完飯立即做埋未完的工作，咁就可以早D回去。
剛執左D野要拎回去，咁我就拎左一張木櫈企高趟開衣櫃門拎環保袋裝，正當我攪掂向右邊轉身右隻腳離開左櫈想落地時，阿婆就話阿B係到，我見到阿B趴轉左係我櫈後玩，咁我就將身再向右轉多D，當我隻右腳放落地時就踩到舊野。
我右隻腳向前滑、右腳趾向前屈曲，我即時收制跪係地下，然後用力握住我D腳趾，因為有D痛我覺得咁樣可以減量痛楚，就在此時聽到佢地好嘈，我抬頭望張木櫈係阿B身上，可能係我頭先跌落地時另一隻腳整跌張櫈，阿B既喊聲與平時不同~好淒涼。後來知到原來係阿B個玩具反轉左，做成一個斜平台，咁就〝線〞左我一鑊。
我叫阿B過來，佢個頭後面有一處腫左半粒波子的傷，阿婆問我點樣？行唔行到？屈到4隻腳趾瘀左、腳指公對下個〝較〞位腫左、半隻腳紅腫左。我立即與他們回報，娣婦話唔緊要，現在開始行去買鞋，肥仔要9點才收工，最後打比老公，老公問我點？暫時都唔痛，不過，明天可能會痛，唔知明天可唔可以湊阿B呢？老公問有冇人湊阿B和同佢地講聲，阿媽明天放假。
阿婆、老公都問我有冇事，我有事唔緊要最緊要係阿B冇事，我怕佢從此之後會傻傻地，阿婆話唔怕，最緊要唔係腦〝筍〞。
我見阿B眼訓起身去開奶，當我企起身就覺得有D痛，而家D血流到隻腳或企得耐就感覺到有D痛。開奶既米水未凍要座凍，阿B又扭計，阿公&阿婆睇電視~可能撞聾聽唔到，老豆賭馬，冇人理佢，我邊整邊同佢講野，但都係扭，我就發脾氣，阿B又喊，阿婆就過去抱佢。阿B開奶的水係阿媽每朝煲米水開的，天氣凍阿媽話夜晚餐奶不用倒出來待涼。臨走前叫阿婆同阿媽講明天可能唔上嚟！
行路要慢用力就痛或震到就痛，個膝頭唔知係咪又整到，有D怪怪地。我返到去一陣老公就打嚟問我係邊？又問我一陣要唔要買野食？每次老公外出都會問我要唔要食野，我未知，佢一陣會再來電。
老公再打嚟已身在落馬洲，問我隻腳點？紅退左，腫退左少少，但而家到腳眼腫。跟住再打嚟差唔多到問我吃咩？咁夜唯一選擇〝麥麥〞。
阿媽問我情況如何？叫我下次要睇清楚先。叫我明天去睇跌打，我唔去好痛架，我又同阿媽講一次明天可能唔上嚟，阿媽即時話你上唔到嚟更加要睇，睇下明天點至算喇！
老公話頭先D野好難食，食翅都冇魚翅既，所以買左一個餐加個包一齊食。
老公：邊隻？
我：估下。
老公：你的右腳。
我：你咁醒既。
老公：你隻腳側邊紅晒，咁係腳趾屈唔屈到？
我：成塊板咁屈唔到，你睇吓！
當時我隻腳既膚色已回復正常，表面看是不覺整到，都唔知點解成日整到都係冇表面傷痕，攪到我好似扮野咁。我唔知隻腳側邊紅晒，我將腳〝咬〞後提高，但大脾抽筋不能提高。隻右腳好似成隻梗左，有時唔覺意掂到隻腳趾公會痛，又唔知邊到，近D睇發現腳趾公既趾甲對下的地方瘀左青色，我同老公講笑〝吓！腳趾公都面青〞。
我好怕明天要去睇跌打，你明天又放唔到假陪我，又怕阿B有事，佢係發育中怕佢會傻、影響視力‧‧‧。
老公：未有咁快消氣，明天睇下點先決定。
我：咩消氣？
老公：第一浸氣未消腫，因為天氣凍血液運行慢。
我：我同你講樣野不過你唔好發脾氣和唔好嬲喎！點解我成日有事你都陪唔到我既？
老公：咁我要返工‧‧‧
我：我知丫！都話左叫你唔好發脾氣和唔好嬲咯！
我心緊係想老公放假陪我，但知根本係冇可能，我都係講吓啫！老公年假後星期一、二都請左假就當補賞喇！
沒有留言:
發佈留言