呆老‧大個仔

12 January 2008

今日去左肥阿哥家玩，佢地唔講我唔覺阿B今日冇笑過，就好似〝呆老拜壽〞呆老一樣冇乜表情，仲有佢地察覺到阿B大個左好多，我成日對住佢，所以唔多覺，因為平時佢都係咁樣。

阿B除唔笑外又唔多食野，唔知係咪食左藥影響呢？今日仲黏身過前幾日，基本上阿B任何人都唔跟，只是跟我和娣婦兩個人。

下午2點幾去到後，我埋lunch又擾攘左一輪，我見佢咁呆就玩打機比佢睇開心下，阿B見到又嚟踏幾腳，所以就開左佢個人出嚟比佢玩，當然係我地與他一齊玩喇！玩玩下又眼訓，但攪左好耐死都唔訓，我與娣婦去會所同佢玩，去到不知幾開心，仲成日雙手放係背後，好似巡視業務咁，幾犀利丫！

相隔2個幾鐘後阿B係傍晚6點幾就訓左，我見佢訓左就打機，都係玩左半個鐘多D，突然見到阿B由肥阿哥房跑出嚟2頭望，然後行過嚟我到，再踩上塊板到，但佢成頭濕晒，因為好熱。肥仔話點解冇喊既？可能係我冇關房門，平時關房門佢醒左會喊。

阿B既然醒左我就唔打機，肥仔就接手玩，佢玩到唔捨得去食飯添丫！我地食完飯再返嚟玩過。食晚飯時阿B好曳，四周攪野，又唔食野，仲成日指住條街，老公見咁咪抱佢出去行，行左2次都係咁，我就接手抱佢出去。

食完飯返到去都冇打機，我地睇〝勁歌〞，跟住阿B食藥，阿B唔跟肥仔，我就抱佢食藥，娣婦就餵藥。初時食左3隻，還有2隻睡前和24小時，肥仔佢地怕阿B好似尋晚咁未食完奶就訓左，冇食藥，所以再隔多陣就餵埋果2隻。

中場阿B坐係梳化到幾嘆，個位置完全fit晒佢個人，仲識嘆過D大人，阿嫂就話快D拎相機影底佢。

休息完繼續食藥，吃頭一支都有想嘔，食下抖下都食左好耐，到第2支可能好難食，吃第一啖已想嘔，我與娣婦用9秒9時間，我將阿B扭轉身，娣婦拎起個桶，每次餵藥都會預備一個嘔吐桶，佢地見到我地咁樣笑到碌地，肥仔話我地好似練習左好耐，動作非常純熟。初時都嘔左一毫子既size，我見到又想嘔，不停反胃，由於我隻手〝肯〞住阿B個肚，我咪將將手移去另一到，一移開阿B就嘔，我係大人梗係忍住喇！等佢地接手，我就立即衝去厠所，嘔左少少。

從阿B訓醒左唔出聲識得訓醒自己落床行出嚟，這証明左阿B大個仔喇！從未試過咁樣，真係第一次~叻仔！