歲半打針

阿B今日約左9點半去〝健康院〞打歲半針，尋日問肥仔幾點去食野，佢話8點半，我就同佢講好係樓下茶餐廳等，好在問下啫，唔係有排等。

今朝差不多回到家就打比肥仔睇下得未，阿媽話肥仔唔肯起身，而阿B又未起身，唯有返上屋企先。落車時係我左手邊有2個人朝著我個方向跑過嚟，原來係肥阿哥&阿嫂追車返工。

我返到屋企見到肥仔坐係電腦前，我當然話肥仔又話8點半，肥仔話都未夠鐘，阿B又未起身，真係比佢激死，差5分鐘都夠8點半喇！跟住我就去叫醒阿B食奶。由於8點十都未食完奶，我與肥仔就落去食早餐，阿媽就睇住阿B。

我地用9秒9食完個早餐，然後回去湊阿B去打針，返到去阿B都未食完奶，冇時間唯有帶去途中食，最後都係食剩2安。

初時阿B都係坐係車到，後來落地去小朋友玩耍的地方玩，都玩得好開心。突然聽到廣播叫阿B去磅重，行到半路阿B已經喊，佢死都唔肯企要抱，個個氹都唔得，姑娘話阿B黏身，有點不耐煩就叫我抱住阿B磅，再我自己磅，將2個數相減等於阿B重量，平時都唔係咁既，佢可能知道打針。

我地又坐回大堂等，隔左一陣又叫阿B入去姑娘房，阿B一知要入房又喊到死，姑娘問一些阿B既事，想了解下佢既發展、講解今日打什麼針，又做下簡單測試，姑娘比左支筆阿B晝。

姑娘：晝得好叻喎！

肥仔：梗係喇！佢阿媽同佢一齊玩NDS。

我：佢阿媽玩NDS比佢見到，佢又要玩，佢阿媽就冇得玩。

姑娘：佢有冇講野？講單字？

我：都未，有時講〝ba ba〞、〝媽媽〞，唔常講。

姑娘：佢分唔分到誰是誰？

我：識，叫佢比野邊個佢都識。

姑娘：阿B而家要學獨立，佢有冇自己食野？

我：有丫！有時比佢自己〝不〞同一時間我地又餵佢，又有時就比佢自己〝不〞，佢成日都要自己食。

姑娘：而家應該戒片，咁戒片未？

我：而家凍怕冷親佢，不過，之前熱就有兜佢去厠所，但佢唔肯。

姑娘：你地有冇D咩擔心？

我：講野。

姑娘見此就叫我地去counter約返阿B兩歲返嚟睇下需唔需要進一步幫助，一陣去藥房取退燒藥，因為可能會有些發燒，臨走阿B與姑娘〝Give me five〞、飛吻和拜拜，不知幾醒目。

之後返回大堂等，大約半小時後到阿B打針喇！我地一起身阿B又喊，肥仔抱住喊緊既阿B坐低預備打針，但阿B又要我抱，我冇抱佢費事麻煩轉嚟轉去。姑娘話咁大個要打手臂，我就問姑娘可唔可以打大脾？唔可以，因為佢地而家學行怕佢地唔行，冇法喇！嘩！我見姑娘一針拮落手臂仔到，血隨著針浸出嚟！然後要係大堂等20分鐘冇事先走。

肥仔轉比我抱，阿B氹極都唔得，連野食都唔得，肥仔就嗌走人。肥仔就去拎藥，而我就抱阿B係健康院外睇車才停止喊和笑，但睇左一陣就入回去看車，因為藥紙姑娘寫左娣婦個名，肥仔要去找回姑娘寫過藥紙，阿B一直攬住我和僕在我的肩上。

阿B好眼訓攪左1個小時有多才睡了，待訓醒後就行去〝麥麥〞食野、換車和行一陣街。我係〝麥麥〞買完野轉身，見到阿B好開心含情脈脈望住我，野食我未放係枱阿B已經要食。阿B食兒童餐包括：芝士漢堡包、乳酪、Qoo荳奶，阿B都食左1/3個包，又食薯條，吃乳酪時個樣好攪笑，又好喜歡飲Qoo荳奶，肥仔話個乳酪好香，不是太甜，味道都不錯。

我地行一陣都差不多5點，所以等埋娣婦就一齊回家。