大掃除~騎樓

大掃除迎新年，上星期已攪掂左廚房，今日就輪到騎樓，明天就要向廳進發喇！

我由早上十點幾就開工大吉，平時都有執騎樓，但今次有D地方平時我係好少執。我遂一將D野搬出嚟！嘩！真係好〝污租〞，抺完這裡，又抺那裡，成塊布都黑晒，又將唔要既野棄掉。

我執左一陣阿媽就要落街買野，阿婆係廚房整緊魚，得返阿公攪唔掂阿B架喎！但我地冇人得閒睇住佢，於是我叫阿媽帶埋阿B落街。

午飯時間到，我叫佢地唔好等我，我晏D先食，因為未執完，唔想停，而且阿B又成朝都唔訓，我諗佢等我陪佢訓，想快快攪掂，但到2點幾都未完工，唯有暫時停工陪左阿B訓先，等佢訓左我才吃飯，然後繼續開工。

阿B都好乖訓左2個幾鐘，等我可以專心執野，但有D野要等佢醒左先至執得，怕嘈醒佢到時就慘喇！

我掃左地後先將D野搬返入去，唔係就一樣都係〝污租〞，終於係6點幾就完工。嗯！今次都好成功，執完地方大左D多，又乾淨左，不過，唔知係咪年紀大左，條腰有D酸軟。

今次執好左騎樓，可以比阿B係窗口下面D細窗睇街和車，因為佢成日都要我地抱佢係窗口睇街和車，希望明天阿B乖乖等我執野喇！