怒、喜慶祝〝拍拖9週年紀念日〞

剛剛才吃完晚餐，老公話佢洗碗，我話我洗，但係我洗緊碗諗諗下都係讓老公洗，因為我要寫這篇網誌，而家老公洗緊。

尋日去完肥阿哥到打邊爐，再倒數埋先走，回到家我仲要為今日〝拍拖9週年紀念〞蛋糕整餅底，而老公就打機陪我，我地今朝4點才睡，今早8點半就係床〝典〞到8點9才起身，我想再訓，但係訓唔著可能個心記左有好多野做。

今日我地唔會去街，又多人又唔知去邊，所以會係家中渡過，我亦已plan好早、午、晚3餐食乜，全部都係我煮。

早餐：醎瘦肉江瑤柱粥、銀芽冬菇肉絲炒米粉

午餐：焗鬆餅、鮮忌廉泡芙

晚餐：味噌湯、炸蝦餅、香草黑椒牛扒、草莓脆餅

我起身寫埋尋日2篇網誌，又預備今日要煮既野都已經12點幾，差不多1點老公就起身話肚餓我就開始煮早餐，煮煮下老公又訓左，因為我一邊煮一邊寫，所以攪到差不多3點才有得吃。

忽然見到老公眼尾有乾左既眼屎，唉！你有冇洗臉丫？吓！唔記得‧‧‧。跟住老公食食下個樣有D燶燶地，唔通難食？唔係~佢胃痛啫，佢話D米粉有D〝肯〞胃，但係見到佢個樣燶燶地時，我既心情隨之而變差，雖然不是什麼特別事，但有時老公小小既表情或說話會令我的情緒和心情大變~變差，可能這就是我太在意他。

食完早餐和洗碗已差不多5點，跟住我去洗白白，這是我從小家中的規則，出到嚟老公又訓左，我緊係叫佢起身喇！咁晏仲要出去買埋其他材料煮晚餐，係百佳超級廣場買晒全部材料，但豆腐和馬蹄都買晒，唯回家的街市買，在回去途中經過另一間百佳，又睇下錶已6點幾街市應該關門，所以決定入去買埋豆腐，而馬蹄唔用。

回到家立即動工整焗鬆餅和鮮忌廉泡芙，老公又係例牌訓左，整好後又預備晚餐，我剝蝦殼時睇下鐘已9點，唔得喇~快D叫老公起身幫手剝殼先。老公起身第一時間食鬆餅，老公問：「點解冇密糖既？加埋密糖就冇得頂喇！」。老公食完就開工，嘩！蝦膠真係攪到我手都軟埋。

剝完殼就食我最鍾意食泡芙，其實都好擔心會失敗，因為成日聽人講好難整，我成日都想試，但好似好複雜就打消念頭，見今日大日子，所以一試~點知一試成功。跟住又煮味噌湯，但麵豉味太濃，所以都幾醎，飲左半碗就冇飲。

老公：蝦餅味道與街的差不多，不過係咪要再加D野？

我：馬蹄丫嘛！但係都買唔到。我睇過好似有D係加少少肥豬肉，好味D。

由於太夜，所以〝草莓脆餅〞明晚才整。一日3餐老公最喜愛的是醎瘦肉江瑤柱粥、銀芽冬菇肉絲炒米粉。

雖然，今天過得平淡帶點不開心，但能與老公一起過都已足夠，希望能與你一齊渡過每一個紀念日。