我食D乜你唔知架咩？~2008與老爺團年飯

今日娣婦開始全公司放9日年假，又係肥仔踏入假期第2日，所以我今日開始唔駛去湊阿B，直至佢地返工，但如得一個人湊我都會回去幫手。

上星期六老公決定今日與老爺食團年飯，我就等老公放工通知就起程去。老爺唔小心將電視機的台調歪左，所以老公要上去調整番先。我上到去老爺同我傾計，老爺傾返之前傾過的事，但每次傾都係冇結果，因為老公與老爺都各自有自己的已見、立場。老公的顧慮老爺不當是一回事，我好明白佢地，但只可比意見不能做決策權，亦不會偏幫那一方，我身份是中立的。

這次傾左大半個鐘，然後我地落街食飯，由於高達叔叔住附近，所以老公就約埋佢一齊食飯。我地選擇去大排檔，因為老爺喜歡叫餸食飯。剛好有一張枱，坐低後望住個餐牌都唔知食乜，高達叔叔就提意每人叫一個餸。

我記得上次嚟過老爺喜歡吃這裡的〝梅菜扣肉〞，我就點了這個，高達叔叔點了〝椒鹽鮮魷〞、老公點了〝蒜蓉豆苗〞，嘩！等左好耐都未嚟。等的期間老公又想食〝辣酒煮花螺〞，但老爺唔食辣架喎！老公問老爺食唔食，居然老爺話食，可能佢聽唔清楚，落單時我叫左唔好整咁辣。老爺食既時覺得辣又冇味，但我地就梗係唔覺辣喇！我食食下老公問我‧‧‧

老公：你食乜？

我：咪食椒鹽鮮魷囉。

我心想〝我食D乜你唔知架咩？〞。老公問這個問題係因為〝梅菜扣肉〞、〝蒜蓉豆苗〞、〝椒鹽鮮魷〞我只是吃〝椒鹽鮮魷〞。食完飯出到去老爺睇錶，嘩！十點幾咁夜架喇，我以為好早添，跟住拜拜就散隊，行去搭車途中我就問番頭先心想的問題。

我：我食D乜你唔知架咩？

老公：我都叫你點菜架喇！

我：我咪點左梅菜扣肉囉！

老公：你都唔食。

我：老爺食丫嘛！我都唔知食乜，只想食椒鹽鮮魷，高達叔叔都點左咯！

老公都冇正面回答，咁就由他吧！上星期日，高達叔叔提過明晚行花市，所以頭先聯絡左熊貓姐姐，但要問男朋友才決定，咁唯有明天再算喇！