艱辛下完成~

今日我要整〝蘿蔔糕〞，尋日阿媽幫我買左4斤幾蘿蔔，今朝我自己買多2斤幾，然後買獵腸和粘米粉回家開工，但幾經艱辛之下才完成，因為阿B黏身又扭到死。

我諗住阿婆返左鄉下，但係肥仔今日連放3日大假可以睇住阿B，年青力壯咪仲好。好境不常，阿B唔肯跟肥仔，肥仔話阿B尋日都係咁，咩人都唔跟係要黏住娣婦，攪到娣婦飯都食唔到。

今朝我一開門聽到肥仔話比阿B聽〝姑媽〞返左嚟！亦都聽到阿B扭計聲，但唔見人，原來娣婦抱左佢去睇車，之後娣婦餵埋阿B食藥就返工，我開埋奶就去整〝蘿蔔糕〞喇！

阿B又喊又扭計成日都要搵我，一見到我就攬住我爬上嚟要抱，我有時望下佢，又去氹佢陪佢玩，又抱住佢睇電視，我行開左一陣整〝蘿蔔糕〞又係咁，但我又要趕住快D整完，因為要去隔離村食晏~〝麥麥〞，肥仔又話要行一陣買外套。

早上約十點，阿B扭扭下奶都未食完就自己趴轉訓左，但訓左1個鐘又醒左。訓醒後情況冇改善，咁唔係辦法有排都未整完，於是我就用背帶孭阿B係背後，去到廚房又唔掂得又唔攪得咪又開始扭，肥仔入嚟抱阿B，阿B就擰轉面，肥仔就開始鬧阿B。

肥仔：衰仔嚟架！爸爸都唔跟，尋日問你跟唔跟我？你就擰轉面。你唔跟爸爸餓死你，你跌倒我唔會埋你架！

阿B一直都冇理采肥仔，隔左一陣阿B又扭，肥仔入嚟抱左阿B出去玩，阿B玩玩下又要嚟搵我，我諗佢可能肚餓就煲熱D粥叫肥仔餵阿B，肥仔問阿B自己食好唔好？阿B點頭我就去拎阿B私家膠碗和羹，食左少少就唔食。我入去問佢幾次食唔食奶，冇回應即係唔食喇！

隔左一陣阿B企係塊板到〝依依~哦哦~〞，我望下佢睇下咩事，傳嚟一陣臭臭味就叫肥仔聞下，果真痾左。我整埋少少野就去換片，換完片就問阿B食唔食奶，問左幾次先點頭，我就去開奶。肥仔見佢食奶就去抺騎樓既鋁窗，我當然繼續，阿B要中場休息叫人幫佢收奶樽，自己走去玩車、睇電視，我地又各自繼續，可能冇人陪阿B不久又嘈，肥仔停工陪佢，又叫我返嚟先蒸，因為晏，但我要蒸埋先。

我整好已2點幾太晏，唯有去完先蒸。老豆放工回來買左飯盒，阿B見到又要食，都食左4湯匙飯。我地2點幾出發，食完野肥仔去睇衫，這次買衫都歷時1小時有多，行到5點幾回程。

我返到去問阿媽蒸左幾耐？係商場時，阿媽來電我順便叫佢幫我蒸〝蘿蔔糕〞。阿媽問我去唔去睇跌打，唔去喇！冇時間，我地一陣去肥阿哥到唔係到食，阿媽聽到都話好，因為唔駛諗我地既餸。頭先肥仔係商場與肥阿哥、阿嫂電聯，肥阿哥有約唔回來吃，而阿嫂要上堂，咁我地買埋野去佢地家等阿嫂回來吃。

阿B未過去已訓左，娣婦又唔舒服，所以佢地2個冇去。我做左4底〝蘿蔔糕〞拎左一底比肥阿哥，一底回老公家吃。