肥瘦大盜

7  February 2008 (大年初一)

今早約8點就起左身，好努力寫埋未完的網誌，因為今日全日都冇時間寫。我11點就叫老公起身，但係佢賴床，我都知佢好攰就比佢訓多陣，過多半個鐘都係咁，又要趕回家唔係阿媽返左工就見唔到，再加上我餓左好耐，我有食餅都好肚餓，我就開始有D發老脾話〝係咪想我同你開年丫？〞，再〝典〞多一陣才起身。

落到街，嘩！條街好凍丫！11點幾就回到家，老豆同阿媽預備去飲茶，而我地一陣就會去食野。我拎利是比老公比阿B，老公就叫阿B〝請請〞，阿B唔肯喎！咁佢地叫我試下，哈哈！阿B同我請請。上年阿B已經唔肯拎老公比既利是，但我比佢就拎。

肥仔話去食野，但係又唔去沖涼喎！我同老公講好肚餓不如我地落去搵位食住等喇！但老公話問下肥仔大約幾時攪掂，肥仔話而家去沖涼約半個鐘，咁樣就等多一陣喇！在等既途中我對娣婦講〝阿B好似唔係好唔記得我〞，娣婦話唔係，但我話老公前2日都問過我〝阿B會唔會唔記得你架？你放咁耐假。〞，係架~小朋友好快會唔記得。過左一陣阿B痾左臭臭，我就幫阿B換埋片，等多一陣就出發。

我地一心諗住樓下茶餐廳會開，落到去失望，唯有去隔離村食，咁食乜好呢？娣婦、老公都不喜歡吃〝麥麥〞，而另一間茶餐廳又冇開，娣婦想去飲茶，但上次吃過呢度呢間唔好食，得番一個選擇〝銀龍茶餐廳〞，老公非常讚誠去，但我寧願去飲茶都唔多去〝銀龍〞，因為我食過3次又貴又唔好食。

入到去冇乜套餐又要加10%，我地望住個餐牌好耐，幾經艱苦才決定到食乜，老公想叫〝牛腩牛肚河〞，但係我記得食過唔好食，後來改了〝牛丸牛肚河〞，但娣婦仍然叫〝牛腩河〞，因為阿B扭計肥仔就抱左佢出去，後來肥仔入嚟叫埋老公出去。

我諗住打電話叫佢地入嚟食野，未打佢地就入嚟，阿B見到就即刻要食，我諗佢可能肚餓扭計。娣婦都話D牛腩唔好食，肥仔抱住阿B我就餵，但食阿B左少少就唔食，娣婦食完就同阿B出去玩。我地係商場內的情況可到：哎唷！擺Pose~。

我地回到家阿B眼訓唔訓，而老公眼訓就走左上床預備訓，大約4點幾肥阿哥和阿嫂回來了，肥阿哥比阿B既利是封係〝阿Pooh〞好得意架！要佢叫〝伯伯〞~冇講，但叫佢請請就肯，老公見到即刻話〝都話用個得意D既利是封架喇！〞，我都話冇問你買唔買你又冇反應喎！

肥仔係肥阿哥到拎左D戲睇，但部DVD機唔知點解睇唔到，部機和碟都係正版嚟架！肥阿哥拆開部機整下又用消毒藥水抺下裡面就睇到。肥仔又係未開場已嗌煎蘿蔔糕，見有人捧我場梗係去煎喇！唔知點解底糕表面皺皮，大家都覺味道稍甜，我可以接受，肥仔都話佢冇問題。

上星期肥仔已經講過今日想打麻雀，但係屋企今晚要拜神老豆唔打得，實際情況係點我唔知，佢地傾既時候我整緊野，我只知食完飯去肥阿哥邊打，但娣婦和阿B就唔過去。

過到去肥阿哥頭痛唔打，肥仔就叫老公打，老公要睇埋〝秀才愛上兵〞先，在等期間肥仔係冰霜拎左尋日買既〝芒果條〞出嚟吃，阿嫂唔吃這些東西，而老公怕酸唔食，所以我地每人有2條，我地一D都唔覺酸喎！我就比少少老公試，見到佢個樣和手腳都飛起晒就知個答案。

我地打麻雀，而肥阿哥睇碟，我地打完4圈中場休息阿嫂去煎蘿蔔糕做宵夜，吃完再打多4圈，但打完8圈是零晨4點幾，我見未有小巴就提意打時間制，最後一共打左8圈半，結果我地2公婆贏左佢地，不過都係贏百幾蚊啫，比平時打細一半。

其實，我地都唔知小巴有未，但見有巴士就上，雖然，要行多D路好過等唔知有冇既小巴。