寒冷~年三十 (上篇)

上星期已和老公同心協力將屋企清洗乾淨，但今日係年三十，明天不可以打掃、倒垃圾、呢樣、果樣，有見及此我就再掃地、拖地、抺塵‧‧‧。

老公食完lunch來電話街都冇乜人，今日晏晝2、3點熊貓姐姐通知我晚上唔去行花市，不過，高達叔叔搵過同屋住會同我地一齊去行花市，咁都好冇咁冷清，如果唔係就冷清、寒冷就好慘架喇！

我終於等到老公放工回來，咁等埋高達叔叔和同屋住食完團年飯後，我地就可以去行花市。 老公問我食乜？我諗住係樓下茶餐廳食，但老公就諗住去隔離商場食，實際食乜大家都唔知？你去商場食實好多人喇！除非去連鎖店啫！我就係諗住去連鎖店，老公鍾意咁是但喇！

走到街上見都有好多人行完花市，因為見到佢地手上有好多戰利品，不單只街上店內都有好多人。我地行左幾間人又多又冇位，連買野食都排長龍，都唔知食乜？但搵得位嚟又排買都唔知攪到幾時有得食，我就提意買外賣，咁老公決定食〝吉野家〞。

嘩！條龍長到丫~開得2個counter，點解咁慢架？輪到我地時就知道為何，我一行到去就講晒我要D咩野，但個收銀居然逐樣野問我，我講左2個餐都要麵豉湯3次、外賣2次，佢都要問〝飲D咩？〞、〝係咪係到食？〞~真係吹脹。收銀要sale客、講野又慢、經理有時又叫停機，掛唔知得喇！開左咁多年應該都知人流如何架喇！點解都會做到〝冧〞檔既？

老公都好明白佢地，因為佢N年前都做過這類的工作，老公解釋冇人肯這日子返工、廚房做唔切，所以經理要停機、重覆講左咁耐都攰喇！多謝老公，我明白晒喇！

頭先老公話好肚餓，所以叫左個〝至瀛牛肉煎雞雙併飯餐〞，但係呢個餐多D飯架咩？我想要多D餸，而我就食個好普通既〝至瀛和風牛肉飯餐〞。等電梯回家時我問老公：「係咪又係用果D盒盛飯？係咁咪好少囉！咁樣唔抵喎！」，唔知丫！

我將晚餐放係枱上未打開個袋已經聞到老公個餐好香，哦！原來係用另一款盒盛個餐既。食食下高達叔叔來電已吃完團年飯，老公就叫佢聯絡同屋住，我地食完飯好耐都唔見有消息，我就叫老公打比高達叔叔，原來頭先係電話到講左叫老公吃完電佢，但老公聽唔清楚，同屋住有事唔去，高達叔叔問我地去唔去？一陣覆。

如果係咁唔出去~咁冷清，還掂肥阿哥頭先打過2次嚟問我去唔去佢家過年，去肥阿哥家喇！佢話如果夜可以係佢家睡，咁我地梗係唔會喇！老公回覆唔去後不久肥仔來電佢而家係肥阿哥家，但阿B眼訓娣婦剛帶回家，我地都差不多來。

得意事：

頭先搭電梯落街時，有一家人入電梯，有個歲幾既細路女被爸爸抱住，個細路女撩我玩，佢伸手過來我梗係捉住佢隻手喇！出電梯又望住我同我拜拜，行到出去佢都係望住我架，到分道揚鑣佢行上天橋，而我行下面，同佢點頭佢又會跟我做，真係好得意，我仲發現佢著緊件外套阿B都有一件，不過佢係紅色，阿B係灰色。

我地食完飯出發去肥阿哥到，係樓下附近又見到佢地回來，但細路女被另一樣野吸引住，所以睇唔到我。

慾知後事如何請到：寒冷~年三十 (下篇)