足料蘿蔔糕 (內附食譜)

〝蘿蔔糕〞阿媽知我鍾意食，所以請教左人。每年我都會做阿媽既助手，刨蘿蔔絲和幫下手。前幾年節目多左，冇人幫阿媽刨蘿蔔就冇整喇！這次大部分都係跟阿媽以前的做法。

今日做左4底糕，要阿媽幫手蒸糕，阿媽已蒸左1小時，但係唔係固體既，阿媽話蒸左咁耐唔蒸喇！唔熟就係唔熟，我同阿媽都覺得削。這次真係烏龍百出，由於阿B扭計、自己心急又趕時間有好多野都忘記做。

1. 我整既時候都發覺蘿蔔水比上年的多，之前都預備多包粉，若水多就加，又唔記得。


2. 我榨乾蘿蔔絲後才記起加片糖，唯有蘿蔔水加片糖再煲。


3. 加漿水時又唔記得逐少加，我一次過加晒。

我個心有D唔開心，預左比半底客氣婆婆架嘛！頭先咁辛苦整，結果失敗，不過我期望凍後會好D。奇蹟~凍左後真係好好多，底糕唔係實，但又唔係軟淋淋，個效果我可以接受。

純粹個人見解和小發現：刨蘿蔔會癢和痛~

每次都係握住蘿蔔頂部的葉莖刨蘿蔔，刨左咁多年今次我知道點解，問題就係出於蘿蔔頂部的葉莖上。剛才刨刨下覺得有隻手指有D癢痛，望下冇野，再刨多一陣到另一隻，留心D睇下，見到手指癢痛的位置握係蘿蔔頂部的葉莖上係有好多小剌，下次就要小心喇！

蘿蔔糕

材料：(直徑：19.5cm~3底、21.2cmX4cm~1底)

蘿蔔　　　　　　　　　　   6斤 (我用左6斤多D)

粘米粉　　　　　　　　　   1包(600g庄)

配料：

臘腸                             4條

臘肉                                            1條

蝦米　　　　　                大半碗

冬菇                                            約1碗

調味料：

薑                                                 2-3片

片糖　　　　　　　　　　     11/3片

鹽                                 適量

胡椒粉                            適量

做法：

1.          蘿蔔絲刨好，加片糖、胡椒粉、薑片煲滾，備用。

(蘿蔔寒加薑可以驅寒，此時榨蘿蔔水，隻手會熟晒)

2.          起鑊下油，炒香配料，盛起，備用。

3.          榨乾蘿蔔絲水份，盛起蘿蔔絲乾，在蘿蔔水內加入粘米粉順方向攪勻，備用。

(可以用手或布袋榨乾水份)

4.          將蘿蔔絲兜炒，再加入配料同炒，加少少鹽調味。

(不要放太多鹽，臘腸、臘肉本身已有鹹味)

5.          慢慢加入漿水，邊加邊炒至稠身即可。(不斷炒，不然會黏底)

6.          用器皿盛起，以大火蒸1小時。