拿破倫@今非昔比

尋日阿媽係〝聖安娜〞買左4件〝合核蛋糕〞送2件〝拿破倫〞，不過，而家既〝拿破倫〞已經唔係以前果D，而家D〝拿破倫〞中間夾左D蛋糕味道冇以前咁好食，以前中間我估係用糖做成甜甜、脆脆~yummy，所以我叫左阿媽下次唔好買〝拿破倫〞，嗯~我都要搵下點整先，因為我與阿公都好鍾意食架！

今日與阿B去〝惠康〞買餸順便儲印花換〝Wedgwood〞產品，之前換左2個煲，我仲想換多個〝平底不粘煎鍋 26cm〞，不過，仲欠六十幾個印花，現正努力中，

娣婦原本諗住上星期六去〝惠康〞買奶粉就可以有雙陪印花，但可能個個都係咁諗，所以阿B既奶粉被人搶購一空，娣婦話明天再去買。

我邊行邊諗煮咩好呢？阿媽前日買左〝雞腳〞叫我今日整鳳爪，我煮左
〝豉椒鳳爪〞一碟辣和不辣，因為阿婆唔食辣。

然後，經過凍櫃睇左好多次，其實，我想煮牛，但老公北上後又要返公司實好夜，咁夜煮餸一陣阿媽又煩，最後買左豬扒整〝洋蔥豬扒〞，呢味煮定都冇問題喇！老公約6點來電而家先過關唔返公司，唉~早知煮牛喇！

今日〝惠康〞白菜仔貴左，我都買左約一斤喇！煮左老公鍾意既〝蒜蓉白菜仔〞，不過，今次冇用上湯。我唔吃，但有試汁覺得苦苦地，阿媽話好靭，老公話D菜又淋又靭，咁下次唔買喇！

晏晝我又再接再勵整〝芒果布甸〞終尋回昔日味道，原本諗住跟〝Blog友仔~蠍〞整，不過，雪櫃盒奶明天到期，所以再試自己食譜，等我下次又試下〝Blog友仔~蠍〞既食譜先。