再並肩作戰@瑪嘉烈完結 (8-5-2008)

8 May 2008

尋晚寫寫下Blog又開始眼花花，今日叫左老公起身，由於娣婦叫我約9點接更，所以叫老公出門口叫醒我，但太攰又冇教鬧鐘，所以起身時已8點8，起身發現我右邊肩頸好痛和咳唔好咁大力要就住咳，若然唔係右邊頭就好劇痛。

我都攰到咁樣，娣婦連捱3晚通宵又要返工，你話唔駛返工都話丫！一放工就嚟醫院接更，跟住第2日又返工，唔知佢係咪真係頂得住呢？母愛真係偉大。

今日原本肥阿哥2點來同我一齊照顧阿B，但係肥仔都放晏晝，所以肥仔來病房與我接阿B出院，而肥阿哥與Benz哥哥(上次打邊爐肥阿哥同事)來接我地，佢叫阿B叫佢做哥哥，肥阿哥話阿B一出院就坐Benz勒！

尋日應承阿B買包比佢，但後來我都係決定買蛋白蛋糕，自己就買個包上車食，然後買多支水和寶礦力(for 阿B)就飛的士去接更。

我去到阿B喊，娣婦話阿B痾左臭臭，時候冇多就叫娣婦快D走等我攪掂。對面床小妹妹等醫生寫信就可以出院喇！

隔離床媽媽都話阿B咁得意，棟高腳有時又趴轉蹺高個Pat Pat訓。

醫生巡房後見完阿B，阿B都可以出院喇！護士拆左吊鹽水既針，睇下阿B隻手有咩？血跡，可想而知插既時間阿B有幾痛呢！

對面床個小妹妹將自己個橙分左少少比阿B，而我去左醫院2日阿B兩餐都係食〝碎肉菜粥〞，但係尋日食粟米粥和冬菇雞肉粥，點解咁得意既呢？

我成日都聽到小妹妹成日話要食婆婆既〝桂花粉〞，係小妹妹走前我忍不住問〝桂花粉〞係咩嚟？然後小妹妹媽媽拎左比我睇，仲話我知大約邊到有得買，婆婆大約話左我知點煮。

小妹妹仲比左半包我，媽媽都話想比我，但怕我介意，我點會介意丫！求之不得添喇！我地仲交換左電話添！小妹妹係〝知優生〞，佢真係比同齡小朋友講野大D又醒D，媽媽仲叫小妹妹遲D教阿B講野！

阿B換左幾套衫，最後呢套得中間一粒和最底一粒鈕，套衫大到露晒膊，之前幾套都係咁大套，不過就得頸喉一粒鈕門鬆扣唔實，唔知點解醫院既衫永遠都係〝溶溶難難〞。

阿B知道走得不知幾開心，玩到咔~咔~聲，後來換埋衫仲週圍走添！不過，阿B走走下就跌，因為佢病到瘦晒~甩褲，成條褲甩到落腳，後尾都係抱佢咋！