再並肩作戰@瑪嘉烈 (6-5-2008)

6 May 2008

今日整體來講阿B有D扭計，8安奶飲剩1安半，食左少少粥好過前2日，不過Pat Pat就痾到難晒。星期日，係廣安驗便便報告出左，係有〝輪狀病毒~車輪菌〞，係由臭臭傳染既，份報告比左瑪嘉烈 for reference。夜晚老公叫我係街等佢一陣一齊去食飯，但我個頭痛到用少少力都痛，所以佢叫我回家洗白白先。我返到去坐左好耐都唔願郁，個人又痛又攰，攰到唔想郁，食完野就訓左係床抖，一陣就睡著了。

尋晚半夜咳醒，今朝起身全身好攰又痛，叫左老公起身、煮左通粉食完就去醫院接更。我約8點鬆D就到達醫院，娣婦早上返工，晏晝回去休息預備今晚再陪阿B，而阿媽尋晚通知左我約11點到。

我入到病房見到對面床多左個9歲小朋友，係尋晚我地走後一陣到。娣婦話阿B尋晚抽血去化驗，我見到阿B吊鹽水隻手就心痛。我趁阿媽未嚟！影左D相唔係阿媽見到又嘈！

之後見到另一隻手都有針窿和疼痕，更加心痛。

阿B仲未退燒，我十點幾就餵左佢食退燒藥。醫生巡房問左阿B既野後就走，之後我估係大醫生巡房，因為有幾個醫生和頭先個醫生跟住佢去睇病。成班人見到阿B就問‧‧‧

醫生、護士：佢黑眼圈係咪天生咁架？

我：係丫~不過，而家病和唔夠訓又勁左

大醫生：又係問阿B點？佢好瘦。(掀開阿B件衫)

我：係丫~佢而家病，之前都有22磅架！

大醫生用手拈起阿B肚皮，但聽唔清楚遘咩！我見到阿B肚皮唔係即時回復原狀，大醫生應該話佢係脫水。然後去左對面床睇病，頭先個醫生走過嚟同我講，阿B〝血酸〞高(脫水現象)，所以仲要吊鹽水，晏D又要抽血驗，要等佢〝澱粉質〞和其他指數回升先可以出院。

我等到11點幾阿媽仲未嚟就打比佢，因為我有鼻水和痰唔方便係病房清理，終於阿媽11點9先到，佢買左包、批又煲左粥。之後又要抽血驗，阿B不斷叫又喊，我見到阿媽眼泛淚光，係出面聽到心都痛，隻手仔又多左點紅色。

阿B痾左臭臭換片時郁咁就整到張床，然後叫護士換，護士問衫有冇〝污租〞？佢阿媽話尋晚整到少少殊殊和臭臭，咁換埋喇！護士換衫時帶點不滿語氣話：「小心D，我地換衫唔緊要，怕條喉管Block左就要再插過小朋友辛苦。」

晏晝2點幾阿媽拍阿B訓我就趁此出去食左個雞批，而阿媽食左個叉燒批、一個包和煲左阿B唔食既粥。我係3點幾和5點幾食多個包，我與阿媽全日就係食呢D野，因為要外出實在太麻煩勒！

護士入嚟話阿B吊埋包鹽水可以唔駛吊，突然架機響，阿媽就拍玻璃窗叫護士，因為又要除保護衣出去，入嚟又要著麻煩，而護士房與阿B病房相連，我都叫左阿媽唔好拍，後來護士入到嚟話唔好拍玻璃一拍就爛，我心諗唔係掛咁誇張。

後來知道廣安有報告就通知護士，咁有個護士寫緊野又最近門口咁咪同佢講囉！佢望住我，而後面既護士回應，之後就大家都冇講野，我咪企係到等，門口個護士望一望我強顏歡笑後，口黑面黑低頭繼續做野，咁我咪走囉！都唔知呢D咩態度。強顏、口黑面黑護士就係叫阿媽唔好拍玻璃果個囉！

Lunch時阿嫂和老公都問過阿B情況，阿嫂仲話佢明天可以請假照顧阿B，我問左娣婦後就決定明天我與阿嫂一齊照顧阿B。老公就話比我聽明天開始未來半個月都要回大陸做野。

同房既小妹妹朝早有尋晚已經陪緊既媽媽和婆婆，媽媽中途外出過整野，但今晚都係由媽媽陪伴。小妹妹要做腦掃瞄，原本話晏晝可能有位，所以12點幾開始不准進食，點知到我9點走都未掃，真係餓死佢囉！

坐的士時，阿媽問D唔關佢事既野，答完仲問，我就話唔講頭好痛，頭先係病房都話左我頭痛架喇！仲咁多野問。肥仔聽到就問我係咪唔舒服？上星期已經唔舒服架喇！咁佢就話明天我唔駛去佢請假，咁我明晚當更喇！佢話就係預左我明晚當更，所以早上唔駛我去。