再並肩作戰@瑪嘉烈 (7-5-2008)

7 May 2008

尋日見到阿B瘦到得骨，入院磅已瘦左幾磅喇！出院要養返肥佢先得。尋晚太攰食完飯就訓，但係12點9時咳醒左(老公話我知)，連剛訓著的老公都比我弄醒，老公問我係咪發燒，我話好熱感覺好似有D燒，之後開冷氣，老公給左我一杯暖水，我飲完就睡。夜晚老公話今朝5點幾又再咳，不過我係冇醒過，所以我一D印象都冇。今日痰有血絲，而鼻都有血，我諗係整傷左。

今朝8點肥仔打嚟問我野，問到我個人醒晒，以為訓唔返喇！點知係床典下就訓左，到十點幾樓下唔知邊到練舞獅好大聲嘈醒左我。

我打比娣婦問下阿B點樣？尋晚我走後阿B就吊完鹽水，之後週圍走到11點幾就訓，今朝7點幾叫佢起身食奶，之後又訓。又問下對面床個小妹妹點？佢做左腦掃瞄冇事。娣婦話我病今晚佢繼續照顧阿B，我冇事可以照顧阿B，大家係到爭辯一論，娣婦話下星期返早夜晚唔可以照顧阿B，然後佢話同肥仔商議下，我聽到咁就唯有等消息。

隔左一陣與阿嫂通電問下阿B而家點？阿B成日訓，唔訓就扭計，又同阿嫂講左與娣婦既對話，佢地要相討後才有結果。醫生巡房後話阿B出多過入，所以一陣要再吊鹽水。

下午12點幾問阿嫂要唔要買野比佢地食，阿嫂話肥仔肚痛一陣去急症室厠所順便買埋。

下午1點幾肥仔來電：「幫我地買野食，頭先去完厠所，阿嫂來電佢電話都冇聽就趕回去。」，一入到去就見到阿B床有臭臭，於是我去梳洗。

下午2點幾跟住肥阿哥來電問屋企樓下醫生診症時間，出門口前後就打比阿嫂問吃咩？佢地食〝麥麥〞，阿嫂話肥阿哥尋日忍唔到口食左海鮮，所以眼又腫左。

我去買〝麥麥〞前去左A-1買曲奇比對面床小妹妹，因為佢尋日被迫絕食好慘，而且做左掃瞄又冇事，咪買野氹下佢囉！

我去到打比阿嫂話我到左，由於阿B訓左肥仔出嚟食先，之後再打比阿嫂話我走又叫佢幫我比曲奇小妹妹，阿嫂左幾次我係咪走？咁樣我等埋你地食完先，我同阿嫂傾左一陣，肥阿哥叫阿嫂影相比佢睇，於是我就叫阿嫂過D相比我勒！這部係吊鹽水機。

隻手仲瘀過尋日。

阿嫂話頭先肥仔去左痾臭時，阿B又痾左，但痾得好勁，佢件衫、褲和床都有，換片時可能唔為意阿B隻手塊板沾有少少臭臭，於是就叫護士換，護士係有換，但亦都換來一句〝尋日都同姑媽講左小心D架喇！唔係小朋友就會辛苦架勒！〞，我聽完都罄罄地，小朋友好難控制到，唔好話細路丫！你大人唔舒服都好難控制到喇！都痴痴地既。

我同阿嫂講尋日阿媽拍玻璃叫護士事件，阿嫂話掛唔之得護士叫佢地唔好拍玻璃叫護士，而另一個又話唔好拍玻璃尋日你地屋企人拍玻璃叫護士，駛唔駛講咁多次丫！其他野又唔見咁好提咁多次！

星期一，我已不太滿意護士的態度，佢地話佢地做到麻木晒！係咁就唔好做喇！尋日又護士態度又係咁，佢地唔想做就唔好做喇！一D愛心都冇！都唔敬業樂業既！不過，有一個阿嬸好好，佢有禮貌又會同你講笑架！今日又係咁樣，唔通係我對佢地有偏見。

我諗住離開醫院後問下肥阿哥要唔要買野食？阿嫂走前都叫我問下肥阿哥要唔要買野食，問左幾次都話唔駛，最後我話阿嫂要九、十點先返喎！佢就叫我買〝乾炒牛河〞茶餐，沿途都諗住去完肥阿哥到就回家執阿B既玩具去掉，點知睇錶都差唔多5點，所以買完野食比肥阿哥就回老公家，我都等左好耐先有車。

傍晚6點幾阿嫂來電阿B明天可能可以出院，而明天肥仔會請假與我一齊照顧阿B。到晚上十點幾阿嫂再來電頭先肥仔計過冇假，而肥阿哥明天下午2點至晚上9點可以去醫院幫手，所以計劃有變，明天肥仔唔去，而我一個人照顧阿B，再等到2點肥阿哥就會到。阿嫂話若果明12點前可以出院咁就可以打比佢，佢係公司外出1小時幫我手，佢公司與醫院路程坐的士只需幾分鐘，咁明天就咁決定喇！