母親節@2008

大前日問左肥阿哥〝星期日食唔食飯，母親節？〞，肥阿哥話食，但唔好整D咁複雜既野，因為佢怕要整好耐有排都冇得食，之前都諗過下煮咩既！

阿公、阿媽好鍾意食〝生炒骨〞，所以就煮呢味。今次用左上次娣婦借我睇點整〝日本吉列豬扒〞先知自己係上粉方面一直都係錯，這次用回正確既方法。

每次我都係用〝李錦記~甜酸排骨醬〞又方便又簡單，因為我怕自己整汁失敗，攪到D排骨都唔食得就嘥野！

以前檀親都忘記醃排骨，次次都係臨炸前醃一陣，所以唔夠味，今次終於有帶腦喇！記得醃，所以每人都覺得好味，但肥仔就麻麻喜歡這次，佢話蛋味太重，可能再加上佢由上星期三開始〝腸胃炎〞冇謂口，佢話係比阿B傳染。

肥阿哥、阿嫂之前去泰國旅行買左〝米紙〞送比我，一直都冇機會整〝泰式春卷〞，到有一次有機會肥阿哥臨時有事要取消，所以今次又有機會，緊係試整喇！D油有榨，所以今次用完就倒左勒！

不過，用泰國米紙包春卷時有D棘手，因為係我第一次用，而且我用既食譜應該係用普通春卷皮，又唔可以太大力，因為都有一定既硬度~好易爛。突然，叮~我拎左去浸水，咁就開始軟化勒！之後先拎去包餡。

其實，原理有D似腐竹咁，包完望落去感覺似粉果、雞絲粉皮。雖然，米紙都有一定黏性，但我都用左雞蛋封口。起初我炸完覺得太油，而且唔小心一吉就爛，所以之後再煎多次將D油煎返出嚟！下次都係煎算把喇！