瘦了～

之前老公覺得自己瘦左就問我覺唔覺？我真係唔多覺，然後係〝開心大出血〞果日開心果姐姐都發覺老公瘦左。

近排老公公司又煩又忙，平時一日都有3、4個電話比我，而家食完lunch、放工各一個，放工就唔駛講緊係夜喇！

平時老公放工夜屋企人都會食先，而我就會等埋老公，一來自己想、二來老公都想我等埋佢陪佢一齊食。尋晚我冇等又冇留飯比老公，之前老公講左我煮個麵比佢做晚餐就得勒！因為留飯老公怕我與阿媽嘈，因為阿媽成日都會問我〝仲未煮餸丫？〞又叫我自己食先！老公都未放工點煮丫！我知佢都係出於關心，但講咁多次攪到我人都掹~真係好煩！

有時過份關心會有反效果，被問者會覺得好煩，攪到有好多野都唔會同佢講，而變得冇計傾，小時候阿媽與我都會成日傾計，但我長大後通常都會同阿婆傾計，與阿婆傾會舒服得多，唔會有人〝打爛沙盆問到篤〞，又唔會有人〝尋根究底〞。

尋晚老公食完麵坐係到，我望過去見到老公真係瘦左，仲要唔係瘦左少少，係咪老公太多野做呢？又要煩公司、又要煩私事，抑或好似老公咁講佢有暗病呢？(唔好心斜)我緊係希望唔係後者而瘦喇！

今晚同老公講左我煮左〝混醬車仔餸〞，而且冇其他餸要煮，我等埋佢先食，所以老公就話留飯，放工時來電好怒氣講頭先公司發生既事。

我知老公做得好唔開心都要做，因為為左我地既生活。我想快D有間屋，咁我就可以搵野做幫輕下佢，可能我未必會適應到，但我會盡量去做，咁樣起碼大家生活都好D。雖然，我想買既野老公都會買比我，而老公想買既野就好少買，我想令到老公都可以好似我咁樣！