食乜由我話事

尋日講左今日會焗牛肉飯比阿B吃，由於第一次煮，煮既時候水份唔夠中途加過，所以計唔多幾多水，明天再煮多次應該大約預計到幾多水。

阿B都好鍾意食，我煮左半嘜米2餐內吃晒。望落去濕濕地有D似〝一田BB餐廳〞果D飯。

今日又係由我話事煮咩餸，朝早帶阿B去〝惠康〞買定預備明天整〝芒果布甸〞的材料。

行過蔬菜部見到有白菜仔，老公喜歡吃就買左一斤，我覺得多，但阿姐話差唔多，多少少可以留返下餐煮，我見佢〝誠意拳拳〞都唔好意思推。

再行回去凍肉櫃睇下煮咩？突然，〝叮〞煮〝簡易一字骨〞，但要煮好耐，因為好難熟，是但喇！都諗唔到煮咩！

再諗下冰箱應該有雞翼，咁就整〝豉油雞翼〞，晏晝睇〝都市閒情〞教煮〝沙嗲洋蔥雞翼〞，本想跟住煮，但阿B唔食得，所以打消左呢個念頭。

返到屋企打開雪櫃見到有2條〝玉子豆腐〞，我都忘記左，咁樣就今晚煎一條，明晚又煎一條喇！今晚果條差不多由阿B一手包辦~勁！

今日係〝惠康〞換左個環保袋比阿媽，係阿媽想要既！之前阿媽話〝惠康〞可以儲印花換個環保購物袋，於是我去買野時問收銀勒！購物滿25蚊就可以有一個〝惠康~笑哈哈印花〞滿60個就可以免費換一個環保購物袋，不過，〝惠康~笑哈哈印花〞係印係單據上。

後補：每張單最多10個印花，例如：購物總額$300~應該有12個印花，但都係收據都係得10個印花，10個印花為上限，最重要係購物時唔用〝惠康〞膠袋，要自備購物袋先可以有〝惠康~笑哈哈印花〞。

之前娣婦請我地吃過，老公都鍾意，今次得番2包，我與她每人一包，但我要留番同老公一齊〝分甘同味〞。