再並肩作戰@瑪嘉烈 (5-5-2008)

5 May 2008

尋日已經知道阿B唔妥，肥仔與娣婦都帶左阿B去〝廣安醫院〞睇私家醫生，但係今日燒都未退，仲要由晏晝3點幾見阿B塊面和嘴都好紅，一探之下燒到104.6度塞左退燒藥，之後阿B訓左一陣，直到5點幾體溫保持係104.6度，高燒仍未退，我就話應該要去睇醫生，於是就決定去〝瑪嘉烈〞，因為我地都預左阿B要留院，所以去廣安留院一定好貴。

傍晚6點幾到達〝瑪嘉烈〞好多人，而且不停有救傷車到，所以仲會比平時等得耐。等到7、8點都未到，我地等得阿B唔等得，佢發緊高燒可大可小，我忍不住走去登記處問〝仲要等幾耐〞，佢就耍我去分流站問，分流得一個護士和一個幫手。

我：我想問仲要等幾耐？個小朋友由3點幾燒到差不多105度到而家。

護士：有好多人要等，要排隊。

我：但係個小朋友燒到差不多105度，係高燒勒喎！

護士：叫咩名？(佢叫個幫手去拎病人資料)幾時開始燒？有冇睇醫生？

我：3點幾和5點幾探過104.6度，尋日去過廣安睇醫生。

護士拎住阿B份野睇完就叫阿B過嚟！護士一見到阿B就帶少少鬧既語氣話〝發燒唔好著咁多衫，最多衫一件底衫，發燒越焗越燒〞，當時佢係用手扯住阿B件衫講，但就唔係好~好~好~大力。阿B當時著住2件短袖加一件長袖外套，護士耳探阿B燒到攝氏40.7=華氏105.26，仲高過頭先。

頭先護士話著得多衫，我心諗晏晝我見阿B燒得咁勁同佢換左短褲和2件短袖衫，阿媽放工見到已經被阿媽〝依依~哦哦~〞，阿婆知道又一齊係到〝依依~哦哦~〞喇！我講左2句就冇出聲，任佢地講，因為佢地〝盟塞〞。

屋企又被人鬧，醫院又被人鬧，真係難做。

唔駛係大堂再等護士立即叫入去等見醫生，但只准一個大人陪，而且阿B都要戴口罩，後來娣婦行返出嚟拎水，醫護人員又準多一個大人陪，阿B見到要跟我，所以我與娣婦入左去等。

阿B扭醫生睇完我就抱開左佢，娣婦就繼續聽，醫生要阿B照X-Ray，所以由肥仔陪同去照。老公見到等候時間非緊急要四百幾分鐘，而緊急要三百幾分鐘，好在頭先去問下唔係都唔知等幾耐，不過，護士都唔想睇阿B先，講左幾次104.6度高燒先睇咋！當時佢唔睇我就會火山爆發〝發癲〞架喇！

照完X-Ray又係要等，聽到廣播叫阿B個名，肥仔與娣婦就入去再見醫生，醫生要阿B留院，繼續等辦理入院手續。肥仔與娣婦係登記處企左好耐，之後就肥仔一個人等，又等左唔知幾耐，我就走過去睇下咩境況，唔見左肥仔唔知去左邊？後來肥仔出返嚟！仲未入得，我問左幾次點解你出返嚟？佢話見到有人問幾時得，醫護人員就叫媽咪出去，老豆留係到等，之後叫埋老豆出去，肥仔見到咁樣又出埋嚟！人地都冇叫你出嚟！我暗示極肥仔都唔明我想講乜，所以我都放棄左同佢講勒！

等得太耐娣婦入去問下究竟，排板已預備只欠阿嬸帶上病房。今次唔係阿嬸係男職員帶上病房，同行仲有一對夫婦和手抱幾個月大BB。我地行既路好似秘密通冇人行，仲要落地庫又要左兜右兜先上到病房，仲要係病房既後門。

這裡係新起的大樓，而家身處〝兒童傳染病房 / 兒童深切治療部〞只限2個人入去，我與娣婦帶阿B入去。每一間房有4張床，房間被2度玻璃門阻隔住，全部門都係用熱能感應開。娣婦留院陪阿B，而我就明天早上來接更，明晚我都預定我睇阿B，因為佢地要返工。

阿B要吊鹽水，所以我與娣婦要出去等，我聽到阿B喊得好勁。肥仔買左好多杯麵，於是娣婦落去焗杯麵吃，大家已相討明天人手安排。明天阿媽放假，所以早上由我與阿媽照顧阿B，晚上都係由娣婦負責，但我怕娣婦捱不住，娣婦話近排好精神冇問題，經多番推卻，唯有維持原判。

這裡不設探病時間，每日早上9點至晚上9點只可以2個已登記人士在病房內，晚上9點至第2日早上9點只可以1個已登記人士在病房內，這2個時段內不可以中途換人。夜晚落街仲煩，因大樓大堂保安只是早上9點至晚上9點，所以過左夜晚9點後就要係大堂門外打電話比保安，再由保安打去問護士，然後保安確應身份後才落嚟開門比你進入。

原本肥阿哥話明天晏晝佢可以嚟照顧阿B，基於這個原因取消左，大家都話咁樣有幾多個工人都冇用喇！工人即係大家。

大樓大堂要由保安開門才可進入，然後登記。

上到去在外要填表寫低個人資料，穿上保護衣接鐘等人開門。

進入後用腳開第一度玻璃門，然後用手既熱力開第二度玻璃門，就可以見到係想見既人。

病房內要著保護衣，出病房前係第二度玻璃門前要除下保護衣，入病房後立即穿回。

〝污租〞左既保護衣要放入拍定的污衣筒內。

以上做錯一樣立即被〝丙〞型侍候。