趴街爆缸@惠康

今朝如常帶阿B落街跑下，跑跑下又跌倒就叫佢起身拍拍手再跑過，叫左唔好跑要行，但叫極都唔聽。

佢又例牌走入〝惠康〞跑，跑跑下〝咇~啪~〞就跌左落地喊，我即刻上前抱起佢，望下佢見到佢個嘴好似有血，想睇清楚D又唔肯，我用張紙巾抺下喇！嘩~血，有好多血丫。之後，發現我隻手與阿B隻手都有血蹟，呢到又唔係屋企又冇糖，咁我就拎左粒〝司各脫~陽光軟糖〞阿B吃，又比〝寶礦力〞佢飲，有少少血隨住飲管流出，之後又發覺佢塊面都有少少血蹟，不過，我抺過就唔係好明顯。

若然，個口整到流血我就會用糖止血，呢個方法係以前小時候整到住斜對面個〝師奶〞教架！我覺得好有用，萬試萬靈。

衰仔一飲完〝寶礦力〞收聲後又立即要落地，我緊係唔準喇！一直抱住佢去到休憩處一齊坐係櫈到睇車，阿B就〝飲啖茶食個包〞囉！咁我就緊係服侍佢喇！

佢而家好鍾意用手放入〝臭C角〞內，好似人地玩布公仔咁！不過，今日就放腳入去玩。

阿B又食奶嘴和飲奶都冇問題應該頭先都係皮外傷，但事發時嚇到我死咁滯，好擔心佢整到D牙。

阿B前晚開左罐新奶粉，到今朝已經冇左半罐，因為阿B而家每日至5-6餐奶，以一個22個月既小朋友來說是多，不過，之前肥仔同我講過佢肚餓就開奶比佢食，但我話食無定時長大後〝生活無規律〞係專家話架！佢話阿B唔夠營養比多幾餐冇所謂，之後娣婦又叫我開多幾餐比阿B〝高風期〞，阿媽就一向都實行一日幾餐奶既政策，最大問題係每餐開6安又開咁多餐奶阿B都差不多吃晒，我見既然大家都係咁我一個人既堅持又做唔到D乜，自始之後我都跟佢地做法一樣，咁樣我都唔知阿B幾時可以戎到奶。