白行一敞@錶帶

欲知前提如何請到：老婆~〝郎禮〞兼細路

後來我搵到老公亦提意我接佢放工，然後一齊去配錶帶，雖然，老公未知放幾點，但叫左佢比D時間我預備，而家只有等老公電話。

老公來電叫我8點半出門口，我係屋企樓下係巴士總站，見到要搭既巴士著左死火燈，等左好耐先有車返，再等左好耐頭先到站架巴士倒車去另一條線比客上車。

搭完巴士又要轉小巴先去到老公公司附近，本來係〝麥麥〞等老公，但太多人，所以我就去左老公公司樓下等佢。一個人有咩做呢？就係聽住歌，玩電話內我最喜歡的Sodoku來打發時間。因為我著左有少少跟的高跟鞋隻腳好痛丫！所以打左幾次問何時放工？企到腳趾都痺埋。

咁樣等就諗返起以前我返工既時候，以前老公多野做既話，我就會係公司做到咁上下就放工，因為我份工自由好多可以自己話事，然後搭車去到老公公司附近或樓下等佢放工，又係要企好耐架！

終於老公出現係我面前，佢一見到我就當我細路咁氹‧‧‧

老公：你飲唔飲水水丫？、你食唔食mum mum丫？
我：等到我隻腳好痛丫！
老公：係丫~係我唔〝arm〞，我孭你喇！我地去公園坐一陣先喇！
我：咁夜都配唔到喇！
老公：〝黃埔~時間廊〞睇下先喇！冇就買過一隻囉！
我：好貴點買。
老公：慳D囉！去食壽司好唔好？
我：唔食咁貴。你已經好慳架喇啵！
老公：再慳D囉！

其實，我想講食壽司咁貴，不如我地食平D，用食壽司D錢去買本書。之前我係電視睇到梁許安璞女士既專訪，自始愛上她，之後逛書店見到佢著左本食譜書【安璞．滋味．知美】，呢本書要差不多三百蚊，不過，我都係冇講，因為真係好貴。

終於行到去黃埔花園，但〝時間廊〞Closed，我叫老公明天再去睇過，不過應該都唔會有。我又想去影下相，不過，街上太多人，影得又唔靚，所以影左2張就去食野。

由於太夜食肆一係Closed左一係就執左，仲諗住去我地以前拍拖常去既〝扒王之王〞點知執左，最後行左去好遠食麵。

我order左〝水餃牛腩河〞。

老公order左〝牛腩牛肚河〞，不過，睇下佢隻碗係〝雞頭碗〞嚟架！幾得意。老公話吃牛肚係用呢款既碗。

其實，我預左今日配唔到，不過，希望盡下人事啫！點知都係配唔到，但有驚喜就係老公未試過咁樣氹我架！我亦都話左比老公知隻錶係有〝紀念價值〞，老公都話會盡力架勒！但有好多事盡力都未必成功呢！但總好過〝坐以待斃〞。