我的鄰居

傍晚我帶阿B落街買野食和行下，回到家一陣阿婆就話〝想洗米，但無水，滴下都無〞，我心諗緊係比人閂左水制喇！若果係制水又點會即刻無水，最多都係慢D啫！或者有水滴下滴下，又點會即刻無晒水呢！

於是我叫對面屋問下有冇水，對面屋半奄門聽唔到，老豆就出去睇下個水制，真係比人閂左，我知老豆實有去閂隔離屋水制，所以就開佢有冇？然後叫佢開返，其實咁做冇咩為呢？雖然，我都懷疑係佢地做既！不過，我絕對唔會去報仇。

點解老豆有咁既行為？而我有咁既懷疑？一切答案就在下面。

頭先落街買左串燒賣坐低比阿B吃，頭一轉見到有3母子，然後又轉回頭，腦海中這3張臉孔好熟，吖~好似係住係隔離屋，雖然，我居住舊屋邨，但有好多舊鄰居已遷走，佢地係阿B出世一個月到搬來，而且很少碰面，所以不太認得。其後佢地坐左係隔離檯，佢3歲既細仔個波碌左出去都唔執返，等到有個1-2歲小妹妹執起一陣，佢細仔〝二話不說〞就拎回，小妹妹個婆婆都有講下野，小朋友唔識，大人都識回應下，但什麼都冇回應，婆婆、小妹妹只好沒趣的走。

阿B食完我就去買雞脾和燒賣回家一齊吃，就見到佢地起身走，之後我帶阿B去坐車車，見佢地係我前方遠處，之後阿B坐車時，佢地就係我對面岸，坐完就回家。

娣婦已回到家，不過，講緊電話，我地擾攘左一陣，先見到佢地返，點解我咁留意佢地返，因為我覺得佢地應該早過我返到。然後不斷聽到好有節拍拍籃球聲，都拍左好耐就入屋，跟住阿婆就話〝無水〞，老豆開返水制後，隔離屋阿媽就急急腳回家，平時佢行得斯斯然架嘛！何解突然行得咁快呢？照件事咁睇係咪好明顯先？不過，我不會一口咬定是他們，因為我無証據。可能佢地覺得我頭先望一望佢地個樣寸掛！

之前都試過水喉既水突然係一滴一滴地滴下來，之後自行去開返大個水制咪無事囉！

我與娣婦講出此事時，娣婦話頭先講電話時，見到有個人影昅昅下，然後佢地就返喇！

我住舊式長型屋邨，所以我這邊得4戶人住，4戶內得返我與對面屋係舊鄰居。這家人一家4口~爸爸、媽媽和2個仔，但媽媽只是與她家對面的鄰居和我阿媽傾計，都有同娣婦講過2次野，其次就係與邨內的大陸人溝通。住我對面的都話佢地這家寸唔理采人。

有次我回來在電梯口見到佢地3個，跟係見到有個男人由我屋的方向行出來，大家擦身而過後個男人同佢地講野，咁應該係佢地爸爸，但當時可能佢覺得好寸，因為由我家方向有個陌生男人行出來，我更係面無表情喇！我唔出聲時有人話過我寸架！有時可能呢D唔會就出事，我好想與他們一家和好相處，但我睇都好難。

阿B剛出院不久，佢地搬來，有一晚7、8點佢地搬野、裝修，但係正阿B房外，,好嘈架嘛！肥仔咪叫佢地去返自己果邊整，佢地又奇怪唔係自己果邊整，要係人地屋整既？

之後有一次我抱住阿B係屋外行，見到佢帶住個細仔由上層行落嚟！咁我望住佢個仔就同阿B講〝哥哥丫！〞，佢地一D反應都冇〝直行直過〞，小朋友唔識大人都識應酬下丫！

有一次我坐電梯回家，我企係門口旁的角位，門前企左個小朋友，這個小朋友每隔一陣就對我〝上下打量〞，然後一齊出電梯，並行同一方向，我才知係隔壁屋個大仔，佢讀小學架喇！

這家的小朋友會好大聲講野、叫囂，不論出門口或回來都係一樣，有時會企係到講或嘈添！尤其是細果個，所以好多時都嘈醒左阿B，因此老豆就唔鍾意勒！不過，我話小朋友係咁架喇！遲D阿B可能仲勁！

而家老豆見此就會係屋內鬧出去或者自己又嗌，佢一嗌細路就收聲，我怕佢嚇親個細路咋！

我同阿媽講，阿媽就鬧老豆〝冤冤相報可時了〞，做咩去閂人地水喉啫！跟住又話老豆好似星期日咁！我係廚房都聽到D事發經過，小朋友係出面嘈，跟住老豆就訓係床大嗌一聲〝噓〞，老豆張床係大門口旁，小朋友阿媽話〝唔好嘈，BB訓緊覺〞，於是小朋友就昅下，我阿媽話〝BB唔係到丫！〞，小朋友就行去電梯口同小朋友老豆講〝BB唔係到丫〞。之後阿媽話老公做咩同小朋友鬥氣啫！

不過，我地小時間係電梯口玩嘈得滯，實有其中一家人(成條行)開門鬧人架！試過有人成盆水潑出嚟！攪到地下濕晒！呢D就係我小時候嘈的對代，而家都唔會有呢D野，因為隔離鄰舍多數少見，感情都冇咁好，以前左鄰右舍會互相幫助，而家冇呢支歌仔唱喇！