向雞批邁進一步

尋日去完街返到去寫Blog、整相，實在太攰走去床訓一陣又再起身努力過，但係又頂唔住又走返去訓下，之後老公見我食左藥索性就將我歸位等我訓，叫我明天先整，當時我攰到郁唔到勒！唯有咁囉！

今日個鼻、喉嚨就舒服過尋日，耳塞好左好多，可能明天再要去睇多次醫生。今次老公傷過我，因為我睇醫老公公司生冇得claim，係咪好cheap呢？仲要係日本公司喎！cheap到爆。

晏晝整左雞批，一次比一次好，嗯！有進步。今次比之前的好，係個皮薄D，若果個皮再厚返D就係老公心目中的〝雞批〞。這次做法和材料與之前既〝滿意雞批〞一樣，不過，份量就唔同。今次冇鋪食譜，因為我想做到老公心中既〝雞批〞先。

其中一個雞批我壓係撻模時個邊整得太高，所以榻左落嚟！穿左個大窿。

今日老公休息，所以可以陪我去醫院探舅父。尋日問左阿媽探病時間和細舅父身處醫院的位置，探病時間有2段：12點至1點、下午5點半至7點半，老公想5點幾去，但12點幾去時間好用D，所以最後決定12點幾去。

我地去到醫院已見到阿公坐係出面，而阿媽和細舅母入左去睇細舅父，我係出面遊盪見到阿嬸就問下佢〝我想入去探人〞，點知佢話而家唔係採病時間，吓！唔係掛~尋日阿媽話我知架咋喎！原來下午12點至1點已取消左，但係醫院比細舅母既資料仲未改，不過，我地都有入去睇細舅父，但要輪流，因為每次係2個人。

我入左去幾分鐘就出返嚟！因為我既病菌傳染開去，之後到老公入去，但係護士不停行來行去，怕阻住好快就出返嚟！幾分鐘唔夠細舅母都出埋嚟！原來係護士唔准再逗留，佳因而家唔係探病時間。

細舅父虛弱D，可能係只吊鹽水關係，我見細舅母一直觸住細舅父隻手幫佢按摩，真係sweet喇！

探完細舅父係葵涌廣場見到今日〝北京奧運火炬手〞#031~陳 潤 韜(全職健美運動員)，佢好似好急忙打電話，而我見佢身後有個人拎住個好長既盒，我覺得係裝〝奧運火炬〞，不過，老公話唔會喇！點會比你丫！返到去睇電視，真係咁好送支〝奧運火炬〞比你架！

頭先係百佳、惠康都冇晒麵粉，兩間都係得返呢款麵粉咋！咁都要買住先喇！以防萬一。今次整左3個，所以之前麵粉夠用。唔通麵粉真係好缺貨？咁遲D咪唔駛〝阿茂整餅〞囉！

今晚老公終於試左上次係街派既〝熱吻朱古力奶茶〞，佢話唔夠甜自行加左練奶，味道就好飲D。