我的電腦@Notebook

7 June 2008

今日起身後真係唔多想郁，因為骨痛到個頭都就爆好辛苦，但又要出去配番Notebook個火牛，個火牛唔知點解好似有一節溶溶地露左D電線出嚟！同埋個風扇好似唔郁，順便叫佢睇埋。

之後就約左去肥阿哥家玩佢新買既〝Family Trainer〞。

肥仔十點幾來電話今朝6點至而家都係〝黑雨〞，唔係掛等左好耐先等到今日可以去配火牛咋喎！我地等到落左黑雨後一個鐘就打去客戶服務部有人，終於就去配，出去前老公話肚餓，我就焗左個杯麵比佢，自己就煮左個通粉。

上到去果個搵左幾次都話冇貨，又問我有冇留電話或名留貨，上次我問左佢話有貨又冇叫我留資料，咁樣就白行一趟，而家訂要1-2星期先有貨。

風扇佢幫我睇左部機開機時係有風出，可能多塵阻住風扇轉動，部機有冇過熱自動熄左？尋日部機自動熄機3次架喇！我唔知佢係咪過熱而熄。如果放低檢查費要三百蚊，要整就四百蚊，而要換零件就另計，已經訂隻火牛要四百蚊，所以我冇放低。

老公話壞左就買過一部，而家一部都好平，佢想連火牛都唔訂，但我怕係火牛問題，咁樣咪會加速部機壞囉！所以我堅持要訂。

之後我地去左豐澤睇手提電腦，Sony最平都係五千幾，不過，而家D機全部都係用唔好用既〝Vista〞。我又去睇左焗爐，但係得好少款，睇左一陣娣婦來電叫我地幫佢地買茶餐。

等車時記起今日有〝7-11~Paddington Bear〞拎，之前高達叔叔問我有冇印花幫佢換一隻熊仔，因為佢有一隻佢想換比同屋住兩個女，咁arm係阿B入院果排就緊係有印花，仲有多添！返到屋企樓下就問下佢地食咩？點知娣婦自行落去買左佢地仲食埋添！咁樣只係買我與老公果份，等外賣時就去拎熊仔

嘩！真係好彩呢隻係最後一隻，我知係要開左個盒先睇到，以為係用透明袋入住，但我估唔係用黑色袋封住。

我地食既時候得原味，所以訂左2包原味。紅色packing係辣架！果盒吐司就係肥阿哥話〝還好吃〞，不過，我未試，阿嫂叫開，但我怕被我食晒，都係唔開好D，但有試個芝士條，真係芝士，我呢個芝士怪覺得麻麻，外型似魷魚絲，口感都有D似，但好鹹和太芝士勒！

肥阿哥幫我拆開左部機睇！風扇係郁既冇壞。之前老公幫我包住左火牛爛既地方，肥阿哥話個火牛係有問題，佢比左個金屬我抬高個火牛，因化學原理散熱係會快D既！叫我暫時用住捱到個新火牛到先。

佢又話我部機慢，咁我就叫佢教我剷機和裝機，呵~肥阿哥用個500G hard disk抄起我D野，佢幫我攪埋。

我就睇我想睇好耐既〝魔幻王國~獅子‧女巫‧魔衣廚〞高清版，肥仔佢地未睇完就走左，高清與不高清晝面真係差好遠。起初去到見到呢舊野唔知係咩？我就估佢係DVD機或DVD錄影機，之後忍唔住問下，老公話係高清個盒，哎~冇返工之後對於呢D高科技既野好似〝Say Goodbye〞咁，乜都唔知唔識，多D留意下先！

頭先等整機時睇左大半場〝瑞士 vs. 捷克〞，場球好鬼悶，一D刺激都冇。雖然，我唔識睇波，但老公喜歡我都會陪佢睇。我係唔識，但我會全程投入，因為只要你投入唔識都會識，一齊玩、睇就會開心喇！這是我一直抱住的態度。

我地走既時候一點鬆D，小巴一點總站開出應該我地可以搭到尾班車，不過，老公質疑，我又唔肯定咁就信心動搖左，等左一陣就搭〝的士〞，我地一上〝的士〞架尾班小巴就到喇！