肺積水@細舅父

晏晝問老公要唔要帶飯比佢？佢話可能要放12點，因明天有客嚟Audit。我去醫院前整定今晚既餸一回來就煮得，不過，都係求其煮一味〝粟米碎肉〞，再炒多個菜。夜晚9點幾老公來電‧‧‧

老公：可能要通宵。
我：吓~唔係掛！點解架？
老公：而家仲未落實。
我：咁明天唔駛返工？
老公：好難喇！就係明天有客到先要咁樣。
我：咁即係連踩2日丫？

之後老公冇再來電，我亦唔敢搵佢，因為有好多野做之餘太子爺又嚟左攪攪振。我心諗真係要通宵得我一個人點好呢？終於約12點老公話放工喇！尋日老公已經做到腳抽筋，行到拐下拐下，睡前幫佢按摩左又搽左冬青膏，今晚又係咁，星期六、日、一都可能要返工，哎‧‧‧

尋日細舅父長途來電話今日落嚟香港過香港區睇私家醫生，因為佢個傷口仲痛，而且係鄉下醫院照過肺有好多水，但又打過去廣州教授果邊話肺有水係正常，不過，佢地都係唔放心。

阿媽掛線後我就叫佢打比細舅父叫佢唔好睇私家醫生，因為私家醫生萬一對傷口做過任何野，再返去政府醫院，醫院係唔會承認既，換句話講即係有事醫院唔會負責，等我明天同佢地去醫院睇急症，因為我怕佢地被人蝦，本地人都會被人蝦喇！更何況佢地係鄉下人，細舅母叫埋表姐(二舅父個女)一齊去。

我去到急症室見得表姐一個人，原來細舅父、母剛入左去，咁快既？表姐話到左唔夠5分鐘就去分流，跟住即刻入去等見醫生，我與表姐入到去又係唔夠5分鐘就見醫生，醫生要細舅父抽血、做心電圖和照X-Ray，咁我同表姐就出返去先，我地傾計又講左好多野，從未試過。

等左好耐細舅父照完X-Ray就要留院觀察，咁就一齊上病房，我地等舅父Settle Down之後就回家吃飯，一陣我陪細舅母拎飯比細舅父，因為想睇下見唔見到醫生了解下情況。

我係門口見到阿B佢已經笑騎騎喇！阿婆話我一返嚟佢就笑喇！阿婆拎左個〝蛋白蛋糕〞佢地試，我見尚早就帶阿B落街行下，回來表姐話個蛋糕好食好鬆軟，原來唔一定要用橄欖油架！我諗用橄欖油用意係健康D咁啫！

我又比左〝烤焙乳酪蛋糕〞佢地試，表姐話酸，細舅母就唔係好酸，我與表姐都覺得應該係檸檬汁問題，表姐叫我自己開返間麵包、餅店，其實，之前都有叫過我開，但邊樹有資金丫！同埋等得我嚟D客都餓死勒！其實，而家幾乎不論男女都識整都包、蛋糕，有好多人叻過我好多，阿公都即刻講等佢有排先有得食。表姐又問我麵包點整、菠羅包點整？

頭先係醫院表姐問邊到有讀英文？因為佢諗住請菲庸湊對仔女，佢就返鄉下打理生意。另外又問開〝7-11〞有冇得做？唔知佢係咪想用我個名開，因為要香港永久居民，佢只不過嚟左年幾，之前都問過我開〝7-11〞都比過意見佢，亦有討論過，都話幫佢問下朋友意見，因為熊貓姐姐朋友個阿姨開緊，但忘記左，頭先叫左熊貓姐姐幫我問，我覺得表姐就好有興趣開，因為佢係香港好悶。

晏晝5點幾拎飯比細舅父，佢一見到我地就話頭先抽左十筒血又照左X-Ray，之前係急症又抽左3筒血和X-Ray喇！細舅父每見一個人或聽一個電話都會講一次，雖然，外表好大男人，但其實有時都好小朋友架！

肺積水 Pleural Effusion

肺積水的成因

肺積水是胸內積聚液體的疾病。很多系統不適都可能引致肺積水，例如呼吸系統、心臟、腎臟或肝病。

由呼吸系統疾病引致肺積水，最主要是肺癆、肺炎、癌症和肺膜疾病。

肺積水的病徵

l          肺積水的病徵視乎液體有多少。少量液體往往完全沒有病徵；

l          但如果有大量液體，病人會覺得氣促或胸痛，甚至經驗到胸部沉重的感覺。

診斷肺積水  

l          照胸肺 X 光和驗血；

l          進行胸肺穿刺和肺膜組織檢查，來斷定肺積水的起因。

治療肺積水  

如果積水多，引致肺部收縮，醫生會經胸壁放入膠管，吸取肺液，令病人的肺恢復膨脹，消除氣促。要根治肺積水，便需查出肺積水的原因。